Bashkia e Tiranës deklaroi ditën e djeshme që në cilësinë e aksionerit të Klubit të Futbollit, të fillonte një hetim kombëtar dhe ndërkombëtar për shkeljet dhe korrupsionin 20 vjeçar të Armando Dukës në Federatën Shqiptare të Futbollit.
Ndërkohë pa vonuar shumë, si asnjëherë më parë, Prokuroria e Tiranës ka nisur hetimet për kreun e Federatës Shqiptare të Futbollit, Armand Duka. Hetimet janë nisur pas referimit të bërë nga Policia e Shtetit, për veprat penale të “Shpërdorimit të Detyrës” dhe “Vjedhje duke shpërdorur detyrën”.
Në njoftimin e lëshuar nga Bashkia për këtë çështje, thuhej se prej dy javësh, një skuadër juristësh shqiptarë, amerikanë dhe britanikë po asistojnë aksionerin e Tiranës në një dosje voluminoze shkeljesh, për t’ia prezantuar FBI, DEA, NCA, Scotland Yard, SPAK, Prokurorisë së Tiranës, Krimit Ekonomik, Agjencisë së Pastrimit të Parave, AMA, Hetimit Tatimor, AKU, si dhe ambasadave Amerikane e Britanike në Tiranë.
Mesa duket “dora” e kryebashkiakut të Tiranës paska aq shumë ndikim sa për të nxitur Prokurorinë që në këtë rast të veprojë shpejt, ndryshe nga herët e tjera ku çështjet zvarriten.
Kujtojmë që disa ditë më parë kryebashkiaku Erion Veliaj ka thumbuar kreun e FSHF-së, Armando Dukën i cili është vënë në qendër të vëmendjes për shkak të tentativave që po përpiqet të bëjë për të manipuluar zgjedhjet në futboll. Teksa rrëfeu për një takim që kishte pasur me ish-kapitenin e Milanit, Gennaro Gattuso, Veliaj tha se ‘sporti shqiptar nuk mund të jetë biznesi i llumit’.
Gjatë takimit me përfaqësues të shërbimit TAXI në Tiranë, Veliaj u shpreh se ka ardhur koha që të reformohet edhe sporti, ashtu siç shumë fusha në vendin janë reformuar.
Kryetari i Bashkisë së Tiranës, Erion Veliaj ka thumbuar edhe një herë tjetër presidentin e FSHF-së, Armando Dukën, për të cilin tha se duhet të kishte investuar më shumë për sportin. Sipas Veliajt, Bashkia do te beje punen e vet, edhe pse kjo detyre, sipas tij i takon personave pergjegjes.
“Ne do të bëjmë tonën, edhe pse sporti nuk është gjëja jonë kryesore dhe ndoshta, ata që e kanë punë kryesore sportin, duhet të kishin bërë më shumë. Tirana është gjysma e popullsisë, është gjysma e ekonomisë dhe nuk mund të jetë bashkia e vetme që merret edhe me peshëngritjen, kërcimin së gjati, atletikën dhe futbollin. Por, ne do të bëjmë pjesën tonë dhe do e qajmë”, theksoi Veliaj.
Me shkresën me nr. 23859 prot. më datë 26.11.2021, është referuar në Prokurorinë e Rrethit Gjyqesor Tiranë materiali procedurial për veprën penale të “Shpërdorimit të detyrës”, parashikuar nga neni 248 i k. Penal në ngarkim të drejtuesve e punonjësve të Federatës Shqiptare të Futbollit. Në lidhje me këtë çështje është dërguar material shtesë me shkresën 23859/k/1, prot më datë 03.12.2021. Gjithashtu, me shkresën 23859/k/2 prot. më datë 16.12. 2021, është dërguar sërish material shtesë. Burime të prokurorisë së Tiranës konfirmojnë se çështjes do t’i shtohen dhe dy prokurorë të tjerë për të përshpejtuar hetimin.
