Prokuroria Themelore Publike në Shkup ka kërkuar që ish-zëvendëskryeministri i Maqedonisë së Veriut, Artan Grubi, të vendoset në paraburgim sapo të arrestohet, si i dyshuar për përvetësim gjatë detyrës zyrtare. Masa e paraburgimit, sipas Prokurorisë, duhet të zbatohet menjëherë pas lokalizimit dhe arrestimit të Grubit, i cili besohet se ndodhet jashtë vendit.
Policia e Maqedonisë së Veriut ka bastisur mëngjesin e 16 dhjetorit shtëpitë e Grubit dhe ish-drejtorit të Lotarisë Shtetërore, Përparim Bajrami, në kuadër të hetimeve për përvetësim të paligjshëm të mbi 8 milionë eurove në vitin 2023. Grubi dhe Bajrami nuk u gjetën në shtëpitë e tyre gjatë bastisjeve.
Përveç Grubit dhe Bajramit, në mesin e të dyshuarve për këtë çështje përfshihet edhe ish-kryeministri Dimitar Kovaçevski dhe disa zyrtarë të tjerë të lartë shtetërorë. Ministri i Punëve të Brendshme, Pançe Toshkovski, i bëri thirrje Grubit që të kthehet në vend për t’u përballur me hetimet.
Artan Grubi ka deklaruar publikisht se ndodhet jashtë vendit për një vizitë private dhe se do të kthehet në Maqedoninë e Veriut sapo të përfundojë angazhimet e tij. Ai ka mohuar të jetë i përfshirë në korrupsion dhe i ka quajtur akuzat spekulime.
Hetimet ndaj Grubit vijnë në vazhdën e zhvillimeve të fundit, përfshirë futjen e tij në listën e zezë të SHBA-së dhe akuzat për përfshirje në korrupsion të lartë. Prokuroria gjithashtu ka nisur një hetim për të vërtetuar përgjegjësinë penale të Grubit dhe gjykatësit Enver Bexheti, të përmendur nga Departamenti Amerikan i Shtetit për ndërhyrje në proceset gjyqësore./Rel
