Nicola Gratteri, prokurori i antimafias në Itali është shprehur në një intervistë për emisonin “Tempora” në Ora News, se çereku i Shqipërisë është i mbjellë me marijuanë.
Për më tepër, Gratteri ka shtuar se droga transportohet në vendin fqinj përmes kanalit të Otrantos.
Deklarata e tij ka qenë e fortë, pasi është shprehur se nuk po fliste për shqiptarë që grabisin apo vjedhin vila në Itali, por për mafian shqiptare që është në ngjitje të shpejtë dhe që është e fortë.
Në vitin që shkoi, është shprehur prokurori, në vetëm një operacion është sekuestruar 6 tonë marijuanë e kjo drogë kalohet në Itali përmes kanalit të Otrantos.
Më tej ai është shprehur se pandemia ka ndikuar edhe në aktivitetin kriminal të bandave.
“Natyrisht ky bllokim, kjo pamundësi për të lëvizur ndikon dhe tek aksionet kriminale.
Siç kemi ne vështirësi për të lëvizur kanë dhe ata.
Në këtë moment mafiet po shikojnë përreth, po nuhasin mundësitë për të shtuar aferat e tyre e për të kuptuar se ku mund të investojnë me paratë, që kanë fituar nga trafiku i kokainës”, e mbylli kështu deklaratën e tij prokurori Gratteri.
