Ministrja e Turizmit dhe Mjedisit, Mirela Kumbaro, paraqiti projektbuxhetin për vitin 2025, i cili përfshin një rritje prej 7.9% krahasuar me buxhetin e vitit 2024.
Fokusi kryesor i buxhetit të vitit 2025 do të jetë zhvillimi i qëndrueshëm i turizmit dhe mbrojtja e zonave të mbrojtura, duke theksuar investimet në infrastrukturën ekologjike dhe ruajtjen e mjedisit.
Kumbaro njoftoi se për vitin 2025, Shqipëria ka planifikuar një rritje të investimeve të brendshme me 19%, ndërsa fondet për administrimin e zonave të mbrojtura do të rriten me 49 milionë lekë krahasuar me vitin 2024.
Ajo theksoi se investimet kryesore do të përfshijnë ngritjen e EKO-Park-Ulza dhe ndërtimin e Qendrës Multifunksionale në lumin Vjosa, dy projekte me vlerë totale prej 523 milionë dhe 690 milionë lekësh, përkatësisht.
“Turizmi këtë vit po shfaq dy karakteristika kryesore, të cilat parashikojmë se në vitin 2025 do theksohen akoma më shumë. Së pari, është shtrirja në kohë dhe së dyti shtrirja në territor. Për 9 muajt e parë të vitit, zonat e mbrojtura u vizituan nga 4,5 milionë vizitorë vendas dhe të huaj (shifër që tejkalon gjithë vitin 2023), ndërsa sitet e kulturës arritën rekordin e 1,1 milionë vizitorëve”, u shpreh ministrja Kumbaro.
Në fushën e mjedisit, Kumbaro nënvizoi angazhimin e ministrisë për pastrimin e vijës bregdetare, në kuadër të një programi kombëtar për periudhën 15 qershor – 15 shtator 2025.
Gjithashtu, ajo theksoi se do të vazhdojnë investimet për menaxhimin e mbetjeve dhe mbështetje për bashkitë bregdetare nëpërmjet projekteve ndërkombëtare.
