Kabineti Qeveritar ka organizuar ditën e sotme një mbledhje ku dhe ka prezantuar organizimin e projekt buxhetit për vitin 2022, për të gjithë sektorët.
Ministri i Brendshëm, Bledi Çuçi në një dalje publike pas përfundimit të mbledhjes ka komunikuar dy vendimet e qeverisë lidhur me Policinë e Shtetit.
Çuçi ka theksuar se vendimi i parë ka të bëjë me rritjen e pagave për të gjithë ata punonjës të cilët ushtrojnë detyrën jashtë vendbanimit dhe kjo do të jepet në formë bonusi. Ndërsa vendimi i dytë është rritja e investigimeve në infrastrukturë dixhitale dhe teknologji. Sipas Çuçit kjo do të rrisë efikasitetin në luftën kundër krimit dhe zbatimit të ligjshmërisë.
“Kam dy lajme shumë të rëndësishme për Policinë e Shtetit. E para ka të bëjë me rritjen e pagave të punonjësve të Policisë së Shtetit. Të atyre punonjësve që ushtrojnë detyrën e tyre jashtë vendbanimit, rritje që do vijë në formë bonusi, dhe që do ti çojë deri në 150 për qind pagat e punonjësve të Policisë së Shtetit që ushtrojnë detyrën jashtë vendbanimit. Lajmi i dytë shumë i rëndësishëm me këtë buxhet është rritja e konsiderueshme e investimeve që do bëjmë në infrastrukturën dixhitale dhe në teknologji. Kjo do rrisë efikasitetin e luftës kundër krimit dhe zbatimit të ligjshmërisë. Një nga prioritetet ka qenë zhvillimi i teknologjisë dhe investimet në infrastrukturën dixhitale”, tha Çuçi.
