Gjykata e Posaçme ka shtyrë sërish seancën për dosjen “Metamorfoza”, pasi munguan avokatët e dy të pandehurve. Njoftohet se seanca e radhës do të mbahet më 30 maj.
Në këtë seancë munguan edhe disa prej të pandehurve kryesorë, si Pëllumb Gjoka, Behar Bajri, Edmond Preka, Astmer Bilali, Ardit Hasanbegaj, Oltian Bistri dhe Xahevahir Lita.
Gjithashtu, u bë e ditur zëvendësimi i anëtares së treshes gjyqësore Irena Gjoka, e cila është në leje për arsye familjare, me Erion Çelën. Ai do të bashkohet me gjyqtaret Etleva Deda dhe Floja Hajredinaj.
Në seancën e 7 majit, Gjykata e Posaçme pranoi pjesërisht kërkesën për gjykim të shkurtuar dhe ndau çështjen penale në dy procedura. Pëllumb Gjoka, Edmond Preka dhe Behar Bajri do të gjykohen me procedurë të zakonshme për shkak të veprave më të rënda penale. Ndërsa ish-prokurori Xhevahir Lita, Ardit Hasanbegaj, Astmer Bilali dhe ish-shefi i Operacionaleve Oltion Bistri do të përballen me gjykim të shkurtuar.
Operacioni “Metamorfoza” i SPAK-ut ka çuar në arrestimin e disa ish-drejtorëve të lartë të Policisë së Shtetit, prokurorëve dhe biznesmenëve. Midis tyre janë Oltion Bistri, ish-drejtori i forcave operacionale, prokurori i Kukësit Xhevahir Lita dhe biznesmeni Pëllumb Gjoka. Bistri akuzohet për shpërdorim detyre dhe nxjerrje të dokumenteve sekrete, ndërsa Lita për korrupsion.
Një tjetër ish-oficer policie, Ardit Hasanbegaj, i cili ishte pjesë e Policisë së Shkodrës, dyshohet për përfshirje në tentativën për vrasje të Ibrahim Licit, në bashkëpunim me anëtarët e grupit Bajri.
Shumë nga të përfshirët në këtë grup kriminal, përfshirë Ervis Martinajn, Denis Bajrin dhe të tjerë, vazhdojnë të jenë në kërkim nga autoritetet.
