Ambasada e Shteteve Bashkuara të Amerikës në Tiranë ka reaguar me një status publik për plotësimin e vakancave në SPAK. Përmes mesazhit ambasada thekson se po ndjek nga afër procesin e përzgjedhjes së kandidatëve për plotësimin e tre vendeve vakante, vende që kanë rëndësi në reformën në drejtësi.
Mes të tjerash SHBA konfirmon se mbështet Shqipërinë në luftën e saj kundër korrupsionit dhe krimit të organizuar.
“Ambasada e SHBA po ndjek nga afër intervistat dhe vlerësimet e Këshillit të Lartë të Prokurorisë për kandidatët për prokurorë që aplikojnë për tre vendet vakante të fundit në SPAK. Shtetet e Bashkuara presin që ky proces vendimtar të rezultojë në përzgjedhjen e atyre prokurorëve më të kualifikuar me nivelet më të larta të guximit, profesionalizmit, integritetit dhe pavarësisë. Shtetet e Bashkuara mbeten të përkushtuara për të mbështetur Shqipërinë teksa ajo lufton korrupsionin, forcon institucionet e saj të drejtësisë dhe mbështet shtetin e së drejtës. SPAK mbetet një pjesë kritike e kësaj përpjekjeje”, shkruhet në faqen zyrtare të ambasadës.
