Dy ditë më parë u mbajt seanca gjyqësore e radhës për ish-ministrin e Brendshëm Saimir Tahiri, e cila u shty për ditën e sotme nga tre gjyqtarët Nertina Kosova, Albana Boksi dhe Dhimitër Lara. Saimir Tahiri do të njihet me vendimin përfundimtar të Gjykatës së Apelit, në orën 13:00.
Në senacën e parë gjyqësore, ish-ministri i brendshëm u shfaq i buzëqeshur në Gjykatë, teksa shoqërohej nga avokati i tij, Maks Haxhia.
Prokuroria e përfaqësuar nga Vladimir Mara dhe Dritan Prenci nuk u tërhoqën nga akuzat dhe dënimi 12 vite që kërkuan në Shkallën e Parë.
Ish-ministri i Brendshëm Saimir Tahiri u vu nën akuzë pas arrestimit të grupit “Habilaj” ndërsa që në fillim ai pretendoi pafajësi duke e quajtur një proces farsë me prova të montuara. Kujtojmë se në një seancë maratonë, vitin e kaluar, Saimir Tahiri u dënua me 5 vite burg të konvertuara me gjykim të shkurtuar në 3.4 vite shërbim prove për shpërdorim detyre.
Të dy palët nuk u kënaqën duke e apeluar vendimin, prokuroria që nuk tërhiqet nga kërkesa për dënimin e tij me 12 vite për 3 vepra penale “trafikim i narkotikëve” në bashkëpunim në formën e grupit të strukturuar kriminal, “kryerja e veprave penale nga organizata kriminale”, “grup i strukturuar kriminal”, ndërsa ish-ministri kërkon pafajësi të plotë.
Kujtojmë këtu se Prokuroria e akuzonte Tahirin se në kohën kur ishte ministër i Brendshëm bashkë me ish-drejtorin e Policisë Vlorë, Jaeld Çela kanë bashkëpunuar me Moisi Habilajn dhe vëllezërit e tij për trafikun e drogës. Procesi gjyqësor i stërgjatur për kaq shumë kohë ndaj ish-ministrit tregon shumë për funskionimin e sistemit gjyqësor në Shqipëri. Vendimi përfundimtar që pritet të jepet ditën e sotme, mund të sjellë besimin te shqiptarët se para ligjit jemi të gjithë të barabartë.
