Sipërmarrësi i teknologjisë John McAfee vari veten në qelinë e tij të burgut të mërkurën pasi gjykata e lartë Spanjolle autorizoi ekstradimin e tij në Shtetet e Bashkuara me akuzat e evazionit fiskal. Lajmin e ka konfirmuar avokati i tij për Reuters.
I njohur për sjelljen e tij ekscentrike, McAfee, 75 vjeç, ishte një pionier i softuerit anti-virus, duke prezantuar programin e tij eponim në vitet 1980. Ai ishte paditur në Tenesi për akuzat e evazionit fiskal. Ai gjithashtu u akuzua në një rast mashtrimi kriptovalutash në Neë York. McAfee u arrestua në aeroportin e Barcelonës, pastaj u burgos atje në tetor.
Gjykata e lartë e Spanjës ra dakord të ekstradojë McAfee në Shtetet e Bashkuara, thuhej në një dokument gjyqësor të publikuar të mërkurën. Departamenti i drejtësisë provinciale konfirmoi se një burrë amerikan i moshës 75 vjeç u gjet i vdekur në qelinë e tij të mërkurën.
McAfee kishte ende mundësi të apelonte dënimin e tij por nuk mund të qëndronte më shumë kohë në burg, tha avokati Javier Villalba. “Ky është rezultat i një sistemi mizor që nuk kishte asnjë arsye për ta mbajtur këtë njeri në burg për kaq shumë kohë”, tha Villalba.
Gjatë një seance gjyqësore muajin e kaluar, McAfee tha se duke pasur parasysh moshën e tij, ai do të kalonte pjesën tjetër të jetës së tij në burg nëse do të dënohej në Shtetet e Bashkuara. “Unë shpresoj që gjykata Spanjolle të shohë padrejtësinë e kësaj. Shtetet e Bashkuara duan të më përdorin mua si një shembull”, tha ai
McAfee, i cili i shiti kompaninë e tij të softuerëve Intel (INTC.O) në 2011 dhe nuk kishte më asnjë përfshirje në biznes, bëri një jetëmjaft dinamike. Ai tha në vitin 2019 se nuk kishte paguar taksat e të ardhurave në SHBA për tetë vjet për arsye ideologjike. Atë vit, ai u largua nga Shtetet e Bashkuara për të shmangur gjyqin, kryesisht duke jetuar në një mega-jacht me gruan e tij, katër qen të mëdhenj, dy roje sigurie dhe shtatë punonjës.
Ai ofroi të ndihmojë Kubën të shmangte një embargo tregtare amerikane duke përdorur monedhën e kriptuar dhe kërkoi të kandidonte për presidentin e SHBA për Partinë Libertariane.
