Pedagogët e Universitetit Bujqësor kanë marrë sot vendimin për të bojkotuar mësimin, pasi në tokën që ata janë duke përdorur si fidanishte për të realizuar praktikat mësimore, Bashkia e Tiranës kërkon që të ndërtojë.
Nga ajo që bëhet e ditur, bashkia ka programuar ndërtimin e një shkolle dhe integruar, pra 9-vjeçare dhe të mesme, mirëpo vendi që është zgjedhur për ndërtimin e saj është duke hasur në kundërshtim të hapur të studentve dhe pedagogëve të këtij universiteti.
Kështu që mbledhja e Asamblesë së Pedagogëve ka vendosur në shenjë proteste që të pezullojë procesin mësimor deri në marrjen e një vendimi të drejtë dhe lënien e tokës në përdorim të universitetit.
Para disa ditësh ka pasur edhe një debat verbal mes nënkryetarit të Bashkisë së Tiranës, Arbjan Mazniku dhe njërit prej pedagogëve. Stafi akademik dhe studentët nuk janë duke kërkuar mosndërtimin e shkollës, por gjetjen e një vendi tjetër, ndërkohë që Mazniku ka thënë se territori i pretenduar nuk është i kampusit, por ka pronar dhe pronarët tashmë janë shpronësuar.
