Teksa ndodhemi një ditë para fillimit të vitit të ri shkollor, përfaqësues të dy qeverive Shqipëri-Kosovë prezantuan abetaren e unifikuar për fëmijët shqiptarë.
Ministrja e arsimit Evis Kushi u shpreh se është një ditë e veçantë për kombin dhe se pavarësisht sfidave trevat shqiptare tashmë do kenë një libër të përbashkët.
Gjithashtu ajo tha se sfida aktuale është për të forcuar dhe ruajtur gjuhën e pastër shqipe.
Ministrja e Arsimit dhe Sportit Evis Kushi, gjatë përurimit të Abetares së përbashkët unike me Kosovën, ndër të tjera tha se edhe ministri i Maqedonisë së Veriut ka shprehur dëshirën për t’u përfshirë në këtë nismë, që sipas saj është kaq patriotike.
“Kemi unifikuar kurrikulën e arsimit parauniversitar, kemi tekstin e përbashkët të Gjuhës Shqipe, të rinjtë tanë mund të regjistrohen në shkollë pa asnjë pengesë. Diplomat apo gradat shekncore njihen në të dy vendet, po punohet për enciklopedinë e përbashkët.
Gjuha shqipe e konsoliduar si një ndër më të vjetrat në botë por normalisht kemi sfida, siç është emigracioni.
Sfida jonë është e madhe për të forcuar dhe ruajtur gjuhën e pastër shqipe. Ajo që më gëzon shumë sot, që përvecse kemi ministren e arsimit të Kosovës por edhe të Maqedonisë, i cili që në momentin e parë kur mori detyrën shprehu dëshirën për tu bërë pjesë e kësaj nisme patriotike. Abetare e unifikuar për të gjitha trevat shqiptare i kalon përmasat e arsimit gjuhësor”, deklaron ministrja e arsimit Evis Kushi.
