Ministri i Brendshëm, Ervin Hoxha, ka prezantuar drejtuesit e rinj të Policisë në Shkodër dhe Lezhë, Fatmir Lleshajn dhe Altin Menën.
Gjatë prezantimit të drejtorit Lleshaj, ministri Hoxha theksoi rëndësinë e rritjes së forcës goditëse ndaj paligjshmërisë në përgjithësi, si dhe kundër krimit të organizuar, duke kërkuar zbardhjen e ngjarjeve kriminale.
Ai u përqendrua në parandalimin e krimeve dhe vlerësimin e çdo informacioni të dhënë nga qytetarët dhe inteligjenca si prioritet.
Ministri Hoxha falënderoi gjithashtu ish-drejtorin Edmond Sulaj për kontributin e tij, duke vlerësuar arritjet e mëdha nën drejtimin e tij, veçanërisht në luftën kundër kultivimit të lëndëve narkotike, një problem që kërkon përpjekje të vazhdueshme dhe angazhim të plotë.
Ministri Hoxha prezantoi drejtorin e ri të qarkut Shkodër, Fatmir Lleshajn
Megjithatë, sfida mbetet dhe është e qartë: Grupet kriminale vazhdojnë të jenë një kërcënim për sigurinë dhe qetësinë e qytetarëve të Shkodrës. Ngjarjet e fundit kanë treguar se është urgjente nevoja për të forcuar operacionet dhe për të krijuar një mjedis ku krimi nuk gjen hapësirë për të vepruar. Lleshaj ka detyrën dhe përgjegjësinë për të intensifikuar përpjekjet në këtë drejtim, për të punuar ngushtë me të gjitha strukturat dhe për të forcuar bashkëpunimin me komunitetin”, tha Hoxha.
Ministri Hoxha prezantoi edhe drejtorin e ri të qarkut Lezhë, Altin Mena.
“Gjatë ushtrimit të detyrave, ka qenë pjesë aktive e sukseseve të arritura së bashku me Drejtorin në detyrë Alfred Elezin, të cilin e falënderova për punën e bërë. Ndër arritjet e spikatura të kësaj drejtorie kanë qenë menaxhimi i suksesshëm i rendit dhe sigurisë gjatë një sezoni turistik tejet i ngarkuar dhe, veçanërisht, përpjekjet në luftën kundër narkotikëve. Por duhet ende punë sidomos sa i përket parandalimit të ndërtimeve pa leje në zonat bregdetare duke bashkëpunuar ngushtë me IKMT-në. Ky është një prioritet që kërkon angazhim të plotë dhe bashkëpunim ndërinstitucional. Lezha si një qark me rëndësi të veçantë për shkak të potencialit turistik dhe zhvillimeve ekonomike, ka mjaft sfida që duhen adresuar, prandaj kërkohet një temp i ri pune dhe arritje të qëndrueshme”, tha Hoxha.
