Altin Avdyli ka kërkuar lirimin nga burgu, pasi vuan nga probleme shëndetësore dhe i rrezikohet jeta nga COVID-19.
Nëpërmjet avokatëve të tij “Niçja” ka paraqitur kërkesën për ndryshimin e masës së sigurisë në “Arrest shtëpie”, por është refuzuar nga Gjykata e Posaçme e Apelit.
Në janar të 2020, Prokuroria mbylli hetimet për dosjen “339”, ku të pandehur u morën, 19 persona, midis të cilëve dy vëllezërit nga Shijaku, Astrit dhe Altin Avdyli.
Kjo dosje penale flet për trafikun e 200 kg narkotike heroinë, të cilat u zbuluan në një laborator në Brenog të Hasit.
Mes të pandehurve është edhe vëllai i ish-deputetit të PS në Lezhë, Arben Ndoka, Gjevi Ndoka dhe ish-kampioni i mundjes, Elis Guri.
Për biznesmenin në kërkim dhe Admir Hoxha dhe Hekuran Hoxhën, hetimet vazhdojnë ende.
Këta të dy mbanin kontaktet me shtetasit turk, të cilin sillnin heroinën në Shqipëri përmes Kosovës.
Akuzat për anëtarët e grupit janë “Trafikim lëndësh narkotike”, “Grup i strukturuar kriminal”, “Pastrim i produkteve të veprës penale” dhe “Kryerja e veprave penale në formën e Grupit të strukturuar kriminal”.
Kujtojmë se në dosjen “339” doli në përgjime edhe ish-kryebashkiaku i Durrësit, Vangjush Dako, i cili bisedonte me Astrit Avdylin.
