Zëdhënësi i Presidentit, Ilir Meta, Tedi Blushi, shkoi sot në Prokurorinë e Tiranës, për të dhënë deklarimet e tij, në lidhje me kërcënimin e pretenduar nëpërmjet telefonit.
Blushi u shpreh, se më 21 nëntor e kanë telefonuar dy persona, një shqiptar dhe një i huaj, të cilët i kanë kërkuar që të fshijë një postim.
Zëdhënësi i Metës ka besim te Prokuroria, e cila sipas tij, do të nxjerrë shumë shpejt të vërtetën.
“Kam pasur një telefonatë për të cilën nuk dua të flas tani, shpresoj që të ma thojë prokuroria se kush fshihet pas kësaj. Kam komunikuar me dy shtetas një shqiptar, dhe një në gjuhë të huaj, për të gjitha këto sqarime kam vënë sot në dijeni organin e akuzës i cili besoj se do e zbardhë këtë cështje shumë shpejt. Kam besim te prokuroria te organi i akuzës që do nxjerrë në dritë të vërtetën shumë shpejt. Porkuroria është njohur me të gjitha faktet, sapo kam marrë këtë telefonatë, disa orë më pas kam vënë në dijeni edhe organet e drejtësisë”, tha ai para gazetarëve.
Pak ditë më parë, presidenti Ilir Meta njoftoi, se zëdhënësi i tij ishte kërcënuar nga një ambasadë e huaj në Shqipëri.
Menjëherë pas kësaj ngjarjeje, Presidenca dërgoi kërkesën në Prokurori, për të zbuluar autorët.
