Presidentja e Republikës së Kosovës, Vjosa Osmani, është bërë sërish objekt i një kërcënimi të drejtpërdrejtë, përmes një emaili të dërguar në orët e para të mëngjesit të 16 korrikut.
Mesazhi, i adresuar në postën zyrtare të Presidencës, vjen nga një person që identifikohet si Betim Ibrahimi, me adresën elektronike [email protected].
Në përmbajtje, përveç një thirrjeje ironike për të “punuar më shumë dhe më shpejt”, përshkallëzohet një gjuhë ofenduese, denigruese dhe kërcënuese, duke përfshirë edhe familjen e Presidentes.
Autori i emailit akuzon Osmanin për “tradhti”, duke përmendur vendime të pretenduara politike si ndërrimin e flamurit apo zbatimin e dygjuhësisë në institucionet shtetërore. “Edhe familja jote. Për tradhti. Për ndërrimin e flamurit tonë. Për ndjekjen e njerëzve dhe marrjen e vendimeve bazuar në mendimet e tyre… A janë shenjat në Serbi në të dyja gjuhët, shqip dhe serbisht?”, shkruhet ndër të tjera në emailin e dërguar në orën 00:15.
Deri në këto momente nuk ka asnjë reagim zyrtar nga institucionet shtetërore, as nga Presidenca dhe as nga Policia e Kosovës, por pritet që organet kompetente të nisin hetimet dhe të identifikojnë personin përgjegjës.
Kjo nuk është hera e parë që Presidentja Osmani përballet me kërcënime të këtij lloji. Më herët janë raportuar dhjetëra raste të ngjashme, duke ngritur shqetësime serioze për sigurinë e saj dhe nivelin e gjuhës së urrejtjes në hapësirën publike.
