Presidentja e Kosovës, Vjosa Osmani, ka reaguar ashpër ndaj thirrjeve raciste dhe antishqiptare të bëra gjatë ndeshjes së basketbollit mes Maqedonisë së Veriut dhe Rumanisë, e zhvilluar në qytetin e Kumanovës.
Në një deklaratë publike, Osmani i ka cilësuar këto thirrje si të papranueshme dhe si një sulm të drejtpërdrejtë ndaj frymës së bashkëjetesës dhe respektit të ndërsjellë që duhet të karakterizojë çdo shoqëri demokratike me aspirata për integrim evropian.
Ajo theksoi se “shqiptarët janë popull autokton në trojet e tyre si dhe meritojnë të trajtohen me dinjitet dhe barazi, ashtu si çdo komunitet tjetër”.
Presidentja e Kosovës ka shprehur shqetësimin e saj për mungesën e reagimit nga autoritetet më të larta shtetërore në Shkup, duke theksuar se “zyrtarët më të lartë shtetërorë në Shkup nuk kanë reaguar ndaj kësaj gjuhe urrejtëse e përjashtuese, duke lënë hapësirë për retorika që minojnë tolerancën ndëretnike dhe harmoninë që vendi synon të ndërtojë në rrugën e tij drejt familjes evropiane”.
Ajo e ka cilësuar sportin si një mjet që duhet të bashkojë njerëzit dhe jo të përdoret si platformë për retorika të rrezikshme: “Sporti duhet të jetë mjet bashkimi, jo platformë për ideologji të errëta që ngjallin kujtime të dhimbshme dhe kërcënojnë paqen.”
Në përfundim, Osmani u ka bërë thirrje institucioneve të Maqedonisë së Veriut që të ndërmarrin masa konkrete ndaj organizatorëve dhe nxitësve të këtyre thirrjeve.
“U bëjmë thirrje institucioneve të Maqedonisë së Veriut që të ndërmarrin masa të menjëhershme kundër organizatorëve të këtyre thirrjeve, përgjegjësve dhe atyre që nxisin e përhapin urrejtje, duke dënuar çdo formë të gjuhës së urrejtjes, mbrojtur parimet e bashkëjetesës dhe tolerancës, si vlera bazë të një shteti që synon integrimin në BE.”
Ajo gjithashtu theksoi qartë se “Republika e Kosovës do të mbrojë me vendosmëri dinjitetin e shqiptarëve, kudo që ata jetojnë.”
