Kuvendi i Shqiëprisë vendosi ditën e sotme për shkarkimin e presidentit Ilir Meta më shumicë të votave, por do të jetë Gjykata Kushtetuese ajo që do të thotë fjalën e fundit në lidhje me rastin në fjalë.
Procedurat për shkarkimin e Presidentit të Republikës nga detyra, parashikohen në disa nene për organizimin dhe funksionimin e Gjykatës Kushtetuese.
Në nenin 21 të këtij ligj thuhet se për deklarimin e shkarkimit të Presidentit, vihet në lëvizje Gjykata Kushtetuese me vendimin e Kuvendit që votoi për shkarkimin. Më tej në ligj thuhet se në vendimin e Kuvendit duhet të jenë të shkruajtura argumentet për shkeljet e rënda Kushtetuese ose të krimit të rëndë dhe këto të shoqërohen me provat përkatëse.
Më pas është Gjykata Kushtetuese ajo që ka detyrë që vendimin dhe provat t”i vendosë në dispozicion të Presidentit, në këtë rast Ilir Metës. Ky i fundit ka të drejtën që po me shkrim të japë argumentat që ai i cilëson sit ë nevojshme. Ndërkohë, më tej në nenin 62 parashikohet që çështja mund të kalojë në seancë publike me vendimin e shumicës së anëtarëve. Presidenti ftohet të marrë pjesë në këtë seancë dhe mund të përfaqësohet nga një avokat.
Nëse Presidenti apo avokati i tij mungojnë, seanca vazhdon normalisht. Në përfudnim të shqyrtimit të çështjes, Gjykata vendos nëse Presidenti ka kryer shkelje kushtetuese dhe deklaron shkarkimin e tij nga detyra. Vendimi hyn në fuqi në ditën që shpallet.
Në rastin tjetër, nëse gjyqtarët e Kushtetueses arrijnë në përfundimin se Presidenti nuk ka kryer shkelje, vendimi i Kuvendit shfuqizohet. Çështja nuk pushohet në rast se Kreu i Shtetit jep dorëheqjen gjatë kohës që është në gjykim.
Në nenin 47 parashikohen edhe afate për shqyrtimin e çështjes nga kolegjet ose Mbledhja e Gjyqtarëve, që përfundon tre muaj nga paraqitja e kërkesës. Kur çështja shqyrtohet në seancë plenarë, Kushtetuesja e shpall vendimim e arsyetuar jo më vonë se 30 ditë nga përfundimi i seancës.
