Ilir Meta Presidenti i Republikës, kremtoi sot festat e fundvitit me fëmijët e Fshatit SOS.
Ai shtroi edhe një drekë për fëmijët pa kujdes prindëror dhe festoi së bashku me ta.
Presidenti uroi përzemërsisht Vitin e Ri atyre dhe të gjithë fëmijëve duke shpërndarë libra dhe dhurata simbolike.
“Jam shumë i kënaqur që jemi së bashku në prag të festës së Vitit të Ri duke ju garantuar se nuk do të jeni kurrë vetëm. Urimi im për vitin që vjen është që të jetë një vit më i mirë për të gjithë shqiptarët, por sidomos për të gjithë fëmijët e Shqipërisë dhe për të gjithë ju. Sepse vetëm duke treguar më shumë kujdes, vëmendje e mbështetje ndaj fëmijëve, duke treguar më shumë kujdes ndaj të rinjve ne do ta bëjmë Shqipërinë edhe më të bukur edhe më njerëzore, edhe më të bashkuar, edhe më të fortë, edhe më europiane. Gëzuar dhe mbarësi për 2019-n!”, – tha Presidenti i Republikës.
Bes Kallaku aktori i mirënjohur i humorit ishte i pranishëm dhe dha një atmosferë festive kësaj dreke, ndërsa fëmijët kishin përgatitur recitime dhe këngë të ndryshme.
Gjithashtu Meta, u shpreh se: “Libri është dhurata më e mirë, sidomos për fëmijët. Investimi për arsimimin cilësor të fëmijëve dhe të të rinjve është investimi i duhur dhe më i sigurtë për të ardhmen tonë europiane”.
