Ditën e djeshme është “djegur” edhe raundi i tretë për zgjedhjen e presidentit të ri, pasi palët politike nuk depozituan asnjë kandidaturë. Në mbledhjen e sotme të Konferencës së Kryetarëve, kreu i grupit parlamentar të PS Taulant Balla, propozoi që më datë 4 qershor, të mbahet raundi i katërt për zgjedhjen e presidentit të ri të vendit.
Deri të shtunën e 4 qershorit në orën 12:00 duhet të dorëzohen kandidaturat ndërsa më pas ne orën 16:00 të mblidhet Komisioni i Ligjeve. “Rendi i dites i miratuar ka qenë caktimi i raundit të 4 për presidentin, lidhur me këtë pikë të rendit të ditës, propozoj që raundi për votimin të bëhet ditën e shtunë më datë 4 qershor, ora 18:00.
Afati i depozitimit të kandidaturës të jetë data 4, ora 12:00 ndërsa afati i shqyrtimit të kandidaturës të jetë ora 16:00, data 4 qershor 2022”, u shpreh Balla.
Në raundin e katërt do të jenë socialistët ata të cilët do të sjellin propozimin e tyre për ta votuar në Kuvend. Kandidatura e PS do të jetë rrjedhimisht edhe presidenti i ri i republikës
Si zgjidhet Presidenti?
Kushtetuta parashikon 5 raunde votimi për zgjedhjen e Presidentit të Republikës së Shqipërisë. Në tre raundet e para, Presidenti duhet të zgjidhet me 3/5 e votave, pra 84 vota. Sipas ndryshimeve të bëra sëfundmi në Kushtetutë, në rast se në fund të tre raundeve nuk është zgjedhur ende një person, atëherë kalohet në raundin e katërt, ku Presidenti duhet të zgjidhet me 71 vota. Nëse në raundin e katërt njëri prej kandidatëve të mbetur në garë nuk siguron 71 vota, kalohet për votim në raundin e pestë, ku sërish duhen 71 vota. Nëse dështohet edhe në raundin e pestë, atëherë shpërndahet Parlamenti dhe shkohet në zgjedhje të parakohshme dhe do të jetë maxhoranca e re që do të zgjedhë Presidentin
