Deputetja e Partisë Demokratike Jorida Tabaku ka reaguar pasi Presidenti Bajram Begaj dekretoi ligjin lidhur me Komisonet Hetimore. Sipas deputetes demokrate dekretimi nga presidenti ishte një shans i humbur për të miratuar një ligj gjithpërfshirës në shërbim të mekanizmave të balancës dhe kontrollit që ka pushteti legjislativ ndaj atij ekzekutiv. Gjithashtu Tabaku thekson se ndonëse ky ligj u dekretua nuk do të thotë që nuk bie në kundërshtim me Kushtetutën dhe në antagonizëm me frymën e integrimit europian.
“Dekretimi nga Presidenti i Ligjit për Komisionet Hetimore është një shans i humbur për të pasur një ligj jo vetëm konsensual për të rregulluar funksionet kushtetuese të Kuvendit por gjithashtu edhe një ligj gjithpërfshirës në shërbim të mekanizmave të balancës dhe kontrollit që ka pushteti legjislativ ndaj atij ekzekutiv. Ky dekret nuk do të thotë aspak që ligji i miratuar me votat e socialistëve nuk është në kundërshtim me Kushtetutën dhe në antagonizëm të plotë me frymën e integrimit Europian”, shkroi ajo në rrjetin social X.
