Kryetari i Partisë Demokratike u premton mbulim 100% të tarifës së studimit studentëve nga familje me të ardhura nën 640 mijë lekë.
Basha, zhvilloi sot një bashkëbisedim me disa studentë të Fakultetit të Drejtësisë, të cilët ndanë shqetësimet e tyre për çështjet e drejtësisë në Shqipëri, por dhe problematikat e arsimit në përgjithësi.
Basha u garantoi se nesër me PD-në në pushtet nuk do të mbetet asnjë i ri pa u arsimuar.
“Nuk do ketë asnjë bijë dhe asnjë bir shqiptari që do mbetet pa universitet për shkak të pamundësisë ekonomike të familjes, sepse nga njëra anë të gjithë të rinjtë që vijnë nga familje më të ardhura me më pak se 640 mijë lekë të vjetra në muaj do të përfitojnë 100% subvencionim të tarifës bachelor dhe master, dhe nga ana tjetër shpenzimet shtesë ku një pjesë gjithmonë e me e madhe e familjeve shqiptare nuk i përballojnë dot për fëmijët e tyre, siç mund të jetë qiraja e banesës apo e konviktit, shpenzimet e përditshme që ka studenti, shpenzimet e tjera , librat, transporti etj etj, do mbulohet përmes bursave për këto familje që nuk kanë mundësi t’i mbështesin financiarisht fëmijët e tyre”, deklaroi kryetari i Partisë Demokratike, Lulzim Basha. Studentët pjesëmarrës në takim u ankuan për mësimin online dhe për kushtet e paplotësuara nga qeveria.
/Gazetareforma.com/
