Epidemiologu i njohur shqiptar, Vilson Topulli, mësohet se ka humbur për shkak të virusit Covid-19.
Prej ditësh mjeku ishte i shtruar në Infektiv, ndërkohë që ka humbur jetë pasditen e djeshme.
Epidemiologu Topulli, ishte një prej ekspertëve më të hershëm në Institutin e Shëndetit Publik dhe ishte i specializuar për gjurmimin e rasteve në terren.
Shefja e ISHP-së, Silva Bino, në postim në rrjetet sociale, ka shkruar fjalë prekëse për kolegun e saj i cili u nda nga jeta pasditen e djeshme.
Ndër të tjera Bino e cilëson epidemiologun Topulli si një njeri të palodhur, duke theksuar se ai ishte kujtesa e ISHP-së, pasi kishte filluar punë aty që në moshën 19 vjeçare.
“Kjo pandemi na mori sot kolegun tonë të palodhur, Vilson Topullin. Me Vilin jam njohur gjatë epidemisë së kolerës në vitin 1994. Më pas punova rreth 16 vite me të. Vili ishte personi që njihte çdo skutë që Shqipëri, e njihte vendin dhe këdo që punonte në shëndet publik. Një njeri i palodhur. Ishte historia dhe kujtesa e ISHP ku kishte filluar punën qysh 19 vjeç. Ishte epidemiolog i palodhur i terrenit. Nuk mund ta dinte se vite më pas një pneumoni e tillë do ti merrte jetën. Të na falësh Vili që nuk të mbrojtëm e nuk të shpëtuam dot.”- ka shkruar Bino.
