Prej pesë ditësh, një zjarr masiv ka përfshirë Malin e Dukatit në zonën e njohur si Sotiran, mes fshatrave Tragjas dhe Dukat, duke djegur sipërfaqe të konsiderueshme dhe duke rrezikuar seriozisht Parkun Kombëtar të Llogarasë.
Terreni i thepisur ka penguar ndërhyrjen tokësore me mjete zjarrfikëse, çka ka detyruar autoritetet të aktivizojnë ndërhyrjen nga ajri me helikopterë për të izoluar vatrat aktive.
Në terren janë angazhuar forca të ushtrisë nga Batalioni i Parë i Regjimentit të Këmbësorisë së Jugut, të cilat veprojnë në koordinim me zjarrfikësit, emergjencat civile dhe pushtetin vendor.
Ekipet janë organizuar në katër grupe taktike përgjatë vijës së zjarrit për të frenuar përhapjen e flakëve.
Situatën e ka ndjekur nga afër edhe kreu i Agjencisë Kombëtare të Mbrojtjes Civile, Haki Çako, i cili theksoi angazhimin maksimal të të gjitha strukturave në operacionin e shuarjes.
Ai u bëri thirrje institucioneve për hetim të menjëhershëm të shkaqeve të zjarrit, duke theksuar se “90% e vatrave janë të qëllimshme dhe të shkaktuara nga dora e njeriut”.
