Vrasja e 25-vjeçarit Klodian Rashaj nga një efektiv policie, përpos protestave të drejta e revoltuese nga ana e qytetarëve, risolli një precedent të turpshëm pandëshkueshmërie dhe papërgjegjshmërie nga politikanët dhe zyrtarët e lartë.
Kjo ngjarje e rëndë nxorri në pah faktin që në Shqipëri qytetarët dhe të rinjtë kanë ende një dell revoltimi ndaj padrejtësive, por na rikujtoi edhe precedentin famëkeq “Basha”.
Politika e paskrupullt tentoi që edhe këtë ngjarje të rëndë ta përdore politikisht, ku kreu i Partisë Demokratike, Lulzim Basha u përpoq të nxirrte në pah një staturë të kuruar, duke shkuar për ngushëllim te familja e 25-vjeçarit të ndjerë, apo duke sulmuar nga llogoret e rrjeteve sociale Ramën dhe vartësve e tij duke i kërkuar dorëheqjen.
Mesa duket kryedemokrati Basha përveç gafave në matematikë paska edhe një memorie të dobët, pasi pikërisht 9 vjet më parë kur vetë ai ishte ministër i Brendshëm 4 qytetarë të pafajshëm mbetën të vdekur nga Garda dhe policia në protestën e 21 janarit 2011.
Në atë kohë, 4 qytetarë të pafajshëm, Faik Myrtaj, Aleks Nika, Hekuran Deda dhe Ziver Veizi u vranë duke qëndruar me duar në xhepa në mes të ditës para syve të kamerave dhe të gjithë shqiptarëve.
Basha, sot kryetari i PD-së dhe opozitës, harron se si gjatë asaj kohe bëri një krim shtetëror, duke i mbajtur ison edhe kryeministrit Berisha pasi nuk dorëzoi autorët e vrasjeve në Prokurori dhe detyroi mjekët e Spitalit Ushtarak që të deklaronin versione jashtë logjikës njerëzore që protestuesit ishin vrarë me njëri-tjetrin me “çadra pistoletë” dhe thika me helm.
Mesa duket historia përsëritet dhe precedenti “Basha” vazhdon të zbatohet edhe nga pasardhësi i tij, ministri aktual i Brendshëm Sandër Lleshaj.
Së paku ministri i detyrohet në radhë të parë familjes së 25-vjeçarit të ndjerë dhe të gjithë shqiptarëve, një hetim transparent, një kërkim falje dhe një dorëheqje nga posti politik që mbart për këtë ngjarje të rëndë, e cila ironikisht do të mbahet mend si Dita e Rinisë ku një i ri u ekzekutua nga policia e shtetit të tij!/Gazetareforma.com/
