Gjykata ka pranuar kërkesën e ish-gjyqtares së Kruëjs, Enkelejda Hoxha dhe 8 të pandehurve të tjerë për gjykim të shkurtuar. Kjo do të thotë se gjykata do të marrë vendimin vetëm me provat e siguruara deri tani, pa u thelluar më tej për rastin e gjyqtares dhe të akuzuarve të tjerë . Me pranimin e kërkesës, Enkelejda Hoxha do të përfitojë uljen e 1/3-ës së vendimit përfundimtar. Ndërkohë, seanca e radhës pritet të mbahet më 25 tetor.
Ish-gjyqtarja e Krujës, Enkelejda Hoxha është arrestuar në 11 shkurt në urdhër të SPAK me akuzën e korrupsionit. Në pranga edhe 9 persona të tjerë që ishin të përfshirë në skemën e lirimit të të burgosurve të dënuar për vepra të rënda penale kundrejt shumave të majme që shkonin nga 6 mijë deri në 12 mijë euro. Më 7 nëntor të vitit 2017, Enkeleida Hoxha liroi nga burgu Genci Tafilin, vëllanë e Admir Tafilit, të dy emra shumë të njohur për drejtësinë shqiptare, të akuzuar dhe dënuar për disa vepra penale. Genc Tafili është liruar në vitin 2017 me kusht nga Gjykata e Krujës nga gjyqtarja Enkeleida Hoxha, pasi kreu 17 vite burg.
Ish-gjyqtarja e Krujës ka kërkuar disa herë lirimin nga burgu, por Gjykata e posaçme e Apelit e ka refuzuar vazhdimisht kërkesën e saj.
