Në prag të ndeshjes së rëndësishme kundër Sllovenisë, trajneri i kombëtares së Portugalisë, Roberto Martinez, doli në një konferencë për shtyp ku ndau mendimet e tij për fazën e ardhshme të Europianit dhe përgatitjet e skuadrës.
Martinez theksoi rëndësinë e fazës së eliminimeve direkte që po afron. “Një turne i ri fillon tani, është brenda ose jashtë. Por mund të them se pas këtyre tri ndeshjeve të para, skuadra është gati. Nuk është e lehtë të luajmë në Kampionatin Evropian, por jemi të përgatitur për të përballuar këtë fazë eliminimi direkt,” tha ai, duke theksuar besimin në përgatitjen dhe kapacitetin e ekipit të tij.
Ai gjithashtu vlerësoi përformancën e skuadrave të tjera, përfshirë Slloveninë. “Shumë skuadra kanë treguar këtu se kanë personalitet dhe se besojnë se mund të fitojnë dhe kjo vlen edhe për Slloveninë. Ata janë të organizuar dhe konkurrues, çdo ndeshje vendoset në detajet e vogla: do të duhet të jemi në maksimumin tonë,” shpjegoi Martinez, duke nënvizuar rëndësinë e përqendrimit në detajet që mund të bëjnë diferencën në ndeshje të tilla të rëndësishme.
Duke folur për kundërshtarët e ardhshëm, Slloveninë, Martinez shprehu respekt dhe admirim për arritjet e tyre. “Është një moment historik për ta. Ne e admirojmë atë që po bëjnë, ata luajnë si ekip klubi,” tha ai, duke vlerësuar bashkëpunimin dhe kohezionin brenda skuadrës sllovene.
Ndeshja midis Portugalisë dhe Sllovenisë premton të jetë një përballje e ashpër dhe e mbushur me emocione, ku çdo detaj mund të vendosë fatin e ekipeve në këtë fazë vendimtare të Kampionatit Evropian.
