Presidenti i zgjedhur i Shteteve të Bashkuara të Amerikës, Joe Biden njoftoi të hënën se do të emërojë diplomatin e karrierës William Burns për postin e drejtorit të Agjencisë Qendrore së Zbulimit, CIA-s.
Në një deklaratë të hënën, ekipi i tranzicionit i Joe Biden tha se zoti Burns është një veteran i Departamentit të Shtetit që ka shërbyer atje për 33 vjet, si për presidentët republikanë ashtu edhe për ata demokratë.
Burns i ngjiti shkallët e karrierës përmes trupit diplomatik dhe shërbeu si ambasador në Jordani nën adminastratën e ish-Presidentit Bill Clinton dhe më pas ambasador në Rusi nën administratën e ish-Presidentit, George W. Bush.
Diplomati 64-vjeçar u emërua nënsekretar i shtetit në vitin 2011 nga Presidenti Barack Obama para se të dilte në pension në vitin 2014, për të drejtuar Fondacionin Carnegie për Paqe Ndërkombëtare.
Në një deklaratë, Presidenti i sapo zgjedhur Biden deklaroi a se me përvojën e tij dypartiake, diplomati Burns do të sjellë një qasje dhe perspektivë “apolitike” për zbulimin dhe inteligjencën, që do ta mbajë Amerikën të sigurt.
“Populli amerikan do të jetë i sigurt me të si drejtori ynë i ardhshëm i CIA-s”, deklaroi Biden.
Ambasadori Burns ka marrë tre Çmime presidenciale për Shërbim të Shquar dhe nderimet më të larta civile nga Pentagoni dhe komuniteti i zbulimit amerikan.
Ai është diplomuar për histori në Universitetin LaSalle në Filadelfia dhe ka marrë një master dhe doktoraturë për marrëdhëniet ndërkombëtare nga Universiteti i Oksfordit.
