Në Gjykatën Themelore të Prishtinës ka nisur procesi gjyqësor ndaj Naim Murselit, Granit Plavës dhe Kushtrim Kokallës, të akuzuar për vrasjen makabre të Liridona Ademajt, ndodhur më 29 nëntor 2023 në hyrje të fshatit Bërrnicë.
Të tre të pandehurit u paraqitën në sallë të prangosur dhe të rrethuar nga forca të shumta policore. Në seancë morën pjesë edhe familjarë të viktimës.
Murseli, bashkëshorti i Liridonës dhe i dyshuari kryesor, është deklaruar i pafajshëm, por me një qëndrim kontradiktor: “Nëse provohen pretendimet e Prokurorisë, vetë do të kërkoj dënim të përjetshëm për veten,” tha ai përpara trupit gjykues.
Ndërkohë, Granit Plava zgjodhi të mbrohet në heshtje, ndërsa Kushtrim Kokalla e mohoi fajësinë. I vetmi që ka pranuar përgjegjësinë është Tom Dodaj, i dënuar më herët me 5 vite burg dhe një gjobë prej 5 mijë eurosh, pasi sipas aktakuzës kishte shitur armën e krimit për 280 euro.
Sipas dosjes së Prokurorisë, Murseli kishte planifikuar vrasjen prej kohësh, në bashkëpunim me Kokallën dhe Plavën.
Dyshja dyshohet se kishte rënë dakord që Plava ta ekzekutonte Liridonën në këmbim të 30 mijë eurove. Në aktakuzë thuhet se Murseli e mbajti fizikisht bashkëshorten në momentin e krimit për ta bërë të pamundur që ajo të shmangte plumbin fatal.
Prokurorja Javorka Përlinçeviq deklaroi se krimi kishte motive të forta hakmarrjeje, të nxitura nga probleme të vazhdueshme martesore. Më tej, ajo zbuloi se më 25 qershor 2022 ishte blerë një polisë sigurimi jetësor për Liridonën në vlerën e 3 milionë krunave suedeze shumë që, sipas akuzës, Murseli shpresonte ta përfitonte pas vdekjes së saj.
Fillimisht, rasti u trajtua si një grabitje me pasoja fatale, bazuar në dëshminë e Murselit, i cili tha se një person i armatosur i kishte ndalur gjatë kthimit në shtëpi dhe kishte qëlluar Liridonën.
Por hetimet zbuluan planin makabër që sipas Prokurorisë ishte i mirëorganizuar dhe inskenuar me kujdes për të shpërqendruar hetuesit.
