Afrimi i “Poly”, një stuhi e rrallë e fuqishme verore që ka shkaktuar ndërprerje serioze në rrjetet rrugore, ajrore dhe hekurudhore, ka rezultuar në vdekjen e të paktën tre personave – dy në Holandë dhe një në Gjermani.
Me erëra deri në shpejtësinë 145 kilometra në orë, stuhia “Poly” preku kryesisht rajonet bregdetare të Holandës.
Në qytetin e Haarlem, një grua 51-vjeçare ka ndërruar jetë këtë të enjte (5 korrik). E ndjera humbi jetën tragjikisht pasi një pemë ka rënë mbi makinën me të cilën ajo udhëtonte, siç raporton rrjeti francez “France 24”.
Megjithatë, siç raporton britanikja “Sky News” , autoritetet kanë konfirmuar se të vdekurit janë dy, por deri më tani nuk ka të dhëna të tjera për identitetin e viktimës tjetër.
Në Amsterdam dhjetëra persona janë lënduar nga rrëzimi i pemëve . Që herët në orët e para të mëngjesit të sotëm, erërat e forta kanë shkaktuar probleme serioze në rrjetin ajror dhe hekurudhor të vendit, ku autoritetet u kanë bërë thirrje vazhdimisht qytetarëve të qëndrojnë në shtëpi dhe të mos dalin nëse nuk kanë nevoja emergjente.
Shërbimi Kombëtar i Motit ka lëshuar një “ paralajmërim për stuhi të kuqe”, që është niveli më i lartë i alarmit për pjesën më të madhe të vendit.
