Protesta e 35-të para Bashkisë së Tiranës, e organizuar nga opozita kundër kryebashkiakut Erion Veliaj.
Nënkryetari i Këshillit Bashkiak, Dorjan Teliti, ngriti akuza të forta për shpërdorimin e fondeve publike dhe skandalin e inceneratorit, duke theksuar se vitin e ardhshëm pritet të vidhen 13 milionë euro për një incenerator që nuk ekziston. Teliti kritikoi ashpër qeverisjen e Veliajt dhe deklaroi se për më shumë se dy muaj, ai ka dështuar të sigurojë ndihmën ekonomike për familjet në nevojë.
“Kjo është godina ku zhduken miliona euro nga një incenerator që nuk ekziston. Babëzia nuk ka të sosur. 13 milionë euro po bëhen gati të vidhen vitin e ardhshëm”.Ai bëri një thirrje drejtuar SPAK-ut, duke kërkuar hetime për punonjësit dhe ish-punonjësit e Bashkisë së Tiranës, të cilët janë thirrur për të fshirë dhe manipuluar dokumente. “Trego që nuk je koleg i Veliajt, trego që nuk ke agjendë politike, por je aty për të zbatuar ligjin dhe për të çuar para drejtësisë ata që vjedhin qytetarët,” tha Teliti.
Kryetari i grupit të opozitës, Gazment Këlliçi, kritikoi Veliajn për lidhjet e tij me skandale të shumta korrupsioni dhe akuzoi drejtësinë se po mban Veliajn në postin e tij, pavarësisht akuzave të rënda.
Këlliçi e cilësoi Veliajn si “një politikan të rrënuar moralshëm” dhe të “mbajtur me hatër” nga drejtësia, duke theksuar se krimi i lidhur me inceneratorët është “aq i shëmtuar sa nuk mund të mbulohet.”
“Miliona euro dëme, miliona euro që u janë marrë qytetarëve të Tiranës dhe janë përvetësuar me inceneratorin dhe 5D, është një krim i paamnistueshëm,” tha ai. Këlliçi e mbylli fjalën e tij me një paralajmërim të drejtpërdrejtë për drejtësinë: “Nuk ka Ramë, nuk ka Aleks, nuk ka pastor që e shpëton Veliajn nga drejtësia.”
Në protestë, u theksua gjithashtu se janë bllokuar sërish masat për të ndaluar hetimet ndaj Veliajt, me akuzat se drejtues të tjerë të institucioneve po mbrojnë kryebashkiakun për shkak të lidhjeve politike.
