Qeveria ka parashikuar që me nisjen e vitit elektoral në 2021-in, të rishikojë edhe të gjithë politikën e pagave për administratën, duke parashikuar rritje të pagave.
Sipas ekspertëve, kjo rritje po bëhet edhe për të shtuar sasinë e taksave që shteti akumulon nga pagat, si dhe për të rritur gjithashtu volumin e të ardhurave për sigurimet shoqërore.
Kështu, sipas Ministrisë së Financave, parashikohet se pas rritjes së pagës minimale, pritet që të rritet edhe ajo maksimale për efekt të pagimit të sigurimeve shoqërore. Edhe pse Financat nuk e kanë përcaktuar qartë rritjen mbi pagat e ndryshme, parashikohet që paga maksimale do të rritet deri në 15%.
Një rritje e tillë do ta çonte pagën maksimale nga 114.7 mijë lekë, që është sot, në rreth 131 mijë lekë. Rritja e pagës maksimale pritet që të shtojë automatikisht volumin e pagesave për sigurimet shoqërore, të cilat ndahet mes punëdhënësit dhe punëmarrësit.
Analiza e INSTAT
Në argumentimin e shifrave që bënë INSTAT thuhet se, rritja e pagës maksimale reflekton atë të pagës minimale, që nga 1 janari i vitit të ardhshëm do të shkojë në 30 mijë lekë, nga 26 mijë lekë që ishte më parë.
Referuar të dhënave të INSTAT-it, me pagën aktuale, prej 114.7 mijë lekë, sigurimet e paguara në total janë rreth 31.9 mijë lekë. Nëse paga maksimale shkon 131 mijë lekë, atëherë sigurimet që do të paguhen nga punëdhënësi dhe punëmarrësi, do të jenë 36.5 mijë lekë, ose 4500 lekë në muaj më shumë, (54 mijë lekë në vit) me një rritje prej rreth 14%.
Sipas INSTAT-it, 4.6% e të punësuarve kontribuues në vend kanë një pagë mbi 120 mijë lekë, në fund të 3-mujorit të dytë 2020.
Po sipas INSTAT, 27% e të punësuarve kontribuues në vend paguhen më pagë minimale.
Të punësuarit me sigurime
Referuar të dhënave të Financave, në total në vend, ka 660 mijë të punësuar me kontribute (sigurime shoqërore), nga të cilët rreth 74% janë të sektorin privat jo bujqësor.
Nga totali i të punësuarve, rreth 30 mijë persona paguhen mbi 120 mijë lekë. Për këta persona do të paguhet (nga punëdhënësi dhe punëmarrësi) maksimumi 4500 lekë më shumë çdo muaj (54 mijë lekë ne vit) ose në total 1.2-1.6 miliardë lekë më shumë (rreth 10-13 milionë euro) për vitin 2021.
Ndërsa me pagë minimale paguhen rreth 178 mijë të punësuar në vend, për të cilët pagesa e sigurimeve do të rritet me rreth 1100 lekë në muaj, (13.3 mijë lekë në vit).
Ministria e Financave ka llogaritur në projektbuxhetin e vitit 2021 se, efekti i rritjes së pagës minimale në buxhet, do të jetë rreth 3 miliardë lekë, ose rreth 24 milionë euro.
Si rrjedhojë, nga rritja e pagës minimale dhe maksimale në 2021, punëdhënësit dhe punëmarrësit do të paguajnë në total rreth 37 milionë euro më shumë taksa mbi pagën.
/Burimi: INSTAT; MF/GazetaReforma.com/
