Policia e Vlorës ka zhvilluar një seri kontrollesh në baret, diskot dhe ambientet e muzikës përgjatë zonave turistike të qytetit, me fokus të veçantë zonën e Lungomares, si pjesë e masave për parandalimin e ndotjes akustike gjatë sezonit turistik.
Operacioni, i ndërmarrë nga strukturat e Komisariatit të Policisë Vlorë, kishte për qëllim verifikimin e nivelit të zhurmës në ambientet e natës, respektimin e orareve për muzikën dhe përdorimin e aparaturave të posaçme për matjen e decibelëve, sipas kërkesave ligjore.
Sipas burimeve zyrtare, gjatë kontrolleve nuk u evidentua asnjë rast ndotjeje akustike.
Megjithatë, efektivët kanë sensibilizuar pronarët për normat e lejuara të zhurmës, të cilat sipas standardeve variojnë nga 85 deri në 110 decibel, në varësi të llojit të ambientit.
Policia ka paralajmëruar se për çdo tejkalim të këtyre kufijve, do të ndërmerren masa të rënda administrative, përfshirë gjoba që variojnë nga 200 mijë deri në 400 mijë lekë të rinj. Në raste të përsëritura, nuk përjashtohet edhe ndjekja penale.
Forcat e rendit theksojnë se kontrollet do të vijojnë edhe në ditët në vijim, me synimin për të ruajtur qetësinë publike dhe për të garantuar një mjedis të sigurt për banorët dhe pushuesit që vizitojnë qytetin gjatë muajve të verës.
Pronarët e lokaleve janë ftuar të respektojnë ligjin dhe të kontribuojnë në krijimin e një atmosfere argëtuese, por pa cenuar rendin apo komfortin e komunitetit.
