Një ngjarje e paprecedentë ndodhi në Turqi të premten në mëngjes, kur policia bastisi zyrat e televizionit opozitar TELE1 dhe arrestoi drejtorin e përgjithshëm të lajmeve, Merdan Yanardag. Operacioni u zhvillua nga ekipet e Shërbimit Kundër Terrorizmit (TEM) pas një urdhri gjykate dhe zgjati rreth një orë.
Gjatë bastisjes, prezantuesi i emisionit të mëngjesit, gazetari Göhan Kayış, transmetoi drejtpërdrejt ndërhyrjen policore, duke informuar publikun se forcat e rendit ndodheshin në ndërtesë që në orët e para të mëngjesit. Ai tha se rreth 50 efektivë të TEM morën pjesë në operacion.
Sipas Kayış, kur pyeti drejtuesin e operacionit nëse Yanardag ishte në dijeni për bastisjen, mori përgjigjen: “Nuk mund ta kontaktoni.” Ai shtoi se, bazuar në këtë përgjigje, kuptoi se drejtori ishte tashmë marrë në paraburgim.
Gökhan Kayış: “11. Asliye Ceza Mahkemesi’nin arama emriyle TEM ekipleri TELE1 TV’de arama yapılıyor.” pic.twitter.com/6G6v0oUDtk
— Tele1 TV (@tele1comtr) October 24, 2025
Pak më vonë, Zyra e Prokurorit konfirmoi zyrtarisht arrestimin e Merdan Yanardag, duke bërë të ditur se ai akuzohet për spiunazh në favor të kryetarit të ndaluar të Stambollit, Ekrem Imamoglu, dhe shërbimeve të huaja. Sipas raportimeve të “Hurriyet”, hetimet po përqendrohen në gjetjen e provave që lidhin Yanardag dhe Imamoglu me një përpjekje për të manipuluar të dhënat e zgjedhjeve lokale të vitit 2019 në bashkëpunim me agjenci të huaja.
Avokati i Yanardag, Bilgütay Haki Durna, tha për TELE1 se nuk është informuar ende për përmbajtjen e dosjes. “Kam parë vetëm njoftimin e Prokurorisë. Fatkeqësisht, në vendin tonë shpesh ngrihen akuza të rënda pa prova të mjaftueshme dhe njerëzit privohen nga liria pa bazë. Do të shkoj në stacionin e policisë për të parë dosjen,” deklaroi ai.
Durna theksoi se “është e pamundur të vihet në dyshim identiteti patriotik i Merdan Yanardag”, duke shtuar se në Turqi “njerëzit detyrohen të provojnë se nuk janë fajtorë”. Ai pohoi gjithashtu se familja e gazetarit është “e qetë dhe moralisht e fortë”, e përgatitur për këtë situatë për shkak të natyrës së punës së tij, dhe se do të vazhdojnë procesin ligjor me dinjitet.
