Situata vijon të mbetet e tensionuar në të gjitha pikat ku opozita po zhvillon protestën në Tiranë.
Para Bashkisë së Tiranës, ku protestat kanë vazhduar prej disa javësh, forcat e rendit kanë intensifikuar reagimin ndaj protestuesve.
Policia ka përdorur autobotin me ujë, duke shpërndarë protestuesit dhe hedhur lëndë djegëse, çka ka përshkallëzuar më tej tensionet.
Raportohet se disa protestues janë shoqëruar nga policia, ndërsa situata është përkeqësuar edhe në zona të tjera të kryeqytetit.
Në Sheshin Wilson, forcat e rendit përdorën gaz lotsjellës për të larguar protestuesit, ndërkohë që sekretari i Përgjithshëm i Partisë për Liri, Tedi Blushi, doli përpara autobotit dhe e ndaloi atë duke hipur mbi të.
Një protestuese ka pësuar dëmtime pas përdorimit të ujit me presion dhe gazit lotsjellës, dhe është transportuar në spital.
Po ashtu, një qytetar ka humbur ndjenjat pas përplasjes me policinë te Rruga e Elbasanit.
