Policia e Shkodrës ka zbardhur ditën e sotme përplasjen me armë zjarri që ndodhi mbrëmjen e kaluar në Velipojë, ku disa të rinj tentuan që të vrasin me armë zjarri dy persona të tjerë.
Ngjarja ndodhi rreth orës 22:20 ku të rinjtë tentuan të vrasin me armë zjarri për motive të dobëta dy persona të tjerë të identifikuar si: I. H., 31 vjeç dhe G. M., 36 vjeç, banues në Shkodër. Konflikti nisi në një lokal ku të rinjtë ishin bashkë dhe në debat e sipër kanë nxjerrë armët duke qëlluar mbi njëri tjetrin. Gjatë konfliktit, 31-vjeçari me iniciale I. H. ka qëlluar me armë zjarri pistoletë, duke dëmtuar mjetin e Fatjon Prelës, i cili po përpiqej që të largohej nga vendngjarja bashkë me Alfred Firkuqjen. Ndërsa i plagosur në këmbë ka mbetur G. M., i cili ka shkuar në spital që të marrë ndihmën e parë mjekësore dhe më pas është larguar në banesë.
Agresorët pasi kanë qëlluar ndaj të rinjve janë larguar drejt pyllit afër plazhit për t’i shpëtuar forcave të Policisë, por nuk ia arritën pasi policia i prangosi. Policia u gjeti të rinjve të arrestuar edhe disa doza me lëndë narkotike të llojit kanabis.
Ndërkohë Policia ka nisur kërkimet intensive për kapjen e të riut me iniciale I. H., i cili akuzohet për: “Vrasja në rrethana cilësuese” e mbetur në tentative dhe “Armëmbajtja pa leje”.
Njoftimi i policisë
Shkodër
Policia e Shkodrës zbardh ngjarjen e ndodhur gjatë orëve të mbrëmjes së djeshme në Velipojë.
Vihen në pranga dy shtetas që tentuan të vrisni me armë zjarri dy shtetas të tjerë.
Shpallet në kërkim njëri prej shtetasve që u qëllua me armë, pasi iu kundërpërgjigj me armë autorëve.
Strukturat e Drejtorisë Vendore të Policisë Shkodër dhe të Stacionit të Policisë Velipojë, menjëherë pas njoftimit të marrë mbrëmjen e djeshme se në afërsi të një lokali në Velipojë ishin dëgjuar të shtëna me armë, menjëherë kanë shkuar në adresën e dhënë dhe falë veprimeve të shpejta e profesionale, rrethimit dhe krehjes së zonës u bë e mundur kapja e dy shtetaseve dhe shoqërimi i tyre në ambientet e Policisë, së bashku me automjetin me të cilin ishin larguar nga vendngjarja.
Në përfundim të veprimeve të para hetimore u bë arrestimi në flagrancë i shtetasve F. P. 28 vjeç, banues në Shkodër dhe A. F. 30 vjeç, banues ne fshatin Rec, Velipojë.
Nga tërësia e veprimeve hetimore rezultoi se këta shtetas, në bashkëpunim me njëri-tjetrin, në afërsi të një lokali në Velipojë, rreth orës 22:20 të mbrëmjes së djeshme kanë tentuar të vrasin me armë zjarri, për motive të dobëta, shtetasit I. H., 31 vjeç dhe G. M., 36 vjeç, të dy banues në Shkodër.
Këta shtetas, pas ngjarjes, janë larguar në pyll, por janë kapur nga forcat e Policisë së DVP Shkodër. Gjatë kontrollit u janë gjetur edhe disa doza me lëndë narkotike cannabis, të cilat u sekuestruan së bashku me mjetin në pronësi të shtetasit F. P.
Arrestimi i këtyre shtetasve u bë për veprat penale “Vrasja në rrethana cilësuese”, e mbetur në tentativë, e kryer në bashkëpunim, “Armëmbajtja pa leje” dhe “Prodhim dhe shitja e lëndëve narkotike”.
Gjatë konfliktit, shtetasi I. H. ka qëlluar me armë zjarri pistoletë, duke dëmtuar mjetin e shtetasit F. P., me të cilin po largoheshin të dy autorët. Ndërsa shtetasi G. M. është lënduar lehtë në këmbë dhe pas marrjes së ndihmës së parë është larguar në banesë
Në vijim të veprimeve u bë shpallja në kërkim e shtetasit I. H., për veprat penale “Vrasja në rrethana cilësuese” e mbetur në tentativë, “Armëmbajtja pa leje” dhe vijon intensivisht puna për kapjen e tij.
Vijon puna për zbardhjen e plotë të rrethanave të ngjarjes, identifikimin dhe kapjen e autorëve të tjerë të implikuar në këtë ngjarje, si dhe krehja e zonës, për gjetjen e armëve që kanë përdorur autorët.
