Mbrëmjen e djeshme në autostradën Durrës-Tiranë është rrëmbyer dhe dhunuar Indrit Beqiraj, teksa po udhëtonte më motor me të vëlllanë.
Ndërkohë që më në fund ka ardhur një reagim zyrtar nga Policia e Shtetit, ku bëhet e ditur se sherri ka nisur pas një incidenti rrugor ku një automjet ka goditur motorin e dy vëllezërve Beqiraj. Mësohet se në konflikt e sipër personat që ishin në automjet kanë marrë njërin prej vëllezërve, shtetasin Indrit Beqiraj, të cilin e kanë lënë në rrugë, larg nga vendngjarja, dhe më pas janë larguar.
Sqarim i Drejtorisë Vendore të Policisë Durrës:
Në autostradën Durrës-Tiranë, në vendin e quajtur “Koxhas”, shtetasit G. B. dhe I. B. (vëllezër), duke udhëtuar me motor, dyshohet se janë përfshirë në një incident rrugor, pasi një automjet ka goditur motorin e tyre, i cili për pasojë ka dalë nga rruga. Për këtë shkak, dy vëllezërit janë konfliktuar fizikisht me personat që ishin në automjet.
Në konflikt e sipër, personat që ishin në automjet kanë marrë njërin prej vëllezërve, shtetasin I. B., të cilin e kanë lënë në rrugë, larg nga vendi i konfliktit, dhe më pas janë larguar.
Nga strukturat hetimore të Drejtorisë Vendore të Policisë Durrës, nën drejtimin e Prokurorisë, në bazë të kallëzimit të shtetasit I. B., është regjistruar procedimi penal dhe po punohet për sqarimin e motivit dhe të rrethanave të ngjarjes, si dhe për implikimin e këtyre personave, në ngjarje të tjera.
