Nëntë deputetë të opozitës në vend, anëtarë të Komisionit të Sigurisë, kanë kërkuar një dëgjesë me kreun e SPAK, Altin Dumanin. Kjo kërkesë është motivuar nga një deklaratë e bërë nga Dumani gjatë një raportimi në Këshillin e Lartë të Prokurorisë, ku ai theksoi se “disa çështje nuk mund të hetohen dot në Policinë e Shtetit, për shkak të bashkëpunimit të zyrtarëve të lartë të saj me krimin.” Sipas deputetëve opozitarë, Dumani ka raportuar se “nivelet e larta të Policisë së Shtetit kanë sabotuar hetime të rëndësishme, janë të pabesueshme si dhe kanë penguar hetimin e ngjarjeve të caktuara, duke vështirësuar kështu hetimet e SPAK.” Për këtë arsye, ata kërkojnë që Dumani të paraqitet në mbledhjen e ardhshme të Komisionit për të raportuar mbi gjetjet e tij dhe shqetësimet e tij rreth kësaj problematike, të cilën e konsiderojnë si një problem serioz për sigurinë kombëtare.
Deputetët që kanë firmosur kërkesën janë Ferdinand Xhaferi, Lindita Metaliaj, Isu Çelaj, Flamur Noka, Asllan Dogjani, Ervin Salianji, Lefter Gështenja, Kasem Mahmutaj, dhe Monika Kryemadhi.
Ndërkohë, Ministri i Brendshëm, Taulant Balla, ka reaguar ndaj deklaratave të Dumanit, duke theksuar se bashkëpunimi mes Policisë së Shtetit dhe SPAK është “i shkëlqyer” dhe se nuk ka pasur asnjë dekonspirim në operacionet e tyre të përbashkëta.
