Ditën e sotme në Tiranë ka ndodhur një atentat tek Liqeni i Thatë ndaj menaxherit të shkollës private “Willson”, Lulëzim Mashës. 63-vjeçari i ka shpëtuar mrekullisht plumbave, dhe ka qenë në gjendje të jap një prononcim për median “News 24”.
Ai është shprehur se nuk ka konflikte me askënd dhe nuk ka nje ide se kush mund ta ketë planifikuar atentatin ndaj tij. Masha jep disa detaje për autorin, duke thënë se ai kishte veshur veshje sportive dhe se ndodhej në këmbë.
“Nuk kam konflikt të hapur me askënd, nuk e di se kush fshihet pas këtij sulmi. Atentatori ishte në këmbë dhe i veshur me veshje sportive. Jam në komisariat më kanë thirrur policia. Aty po ziheshin nja dy tre çuna të rinj, po kaloja aty se shkoj për punë. Kur dëgjoj armë bam-bam. Hap krahun unë dhe shoh se dy plumba kishin marrë dhe makinën time. Jo jo, sulmi nuk kishte lidhje. Ndalova në atë kohë kur policia ishte afër se dëgjoi zhurmën dhe shoh se ata të rinj po iknin vrap”, mësohet të ketë thënë Masha.
Kujtojmë se rreth orës 11:30, Masha po udhëtonte me makinën e tij të llojit “Mercedez Benz”, kur pranë nënkalimit të Liqeni i Thatë, i ka zënë pritë një person. Ky i fundit, ende i paidentifikuar ka nxjerrë pistoletën dhe ka qëlluar në drejtim të mjetit ku udhëtonte 63-vjeçari. Manovrat që ka bërë shënjestra me makinë ka bërë që ai t’i shpëtonte këtij atentati pa marrë asnjë plagë. Ndërsa autori është larguar me këmbë në drejtim të paditur. Policia ka bërë me dije se ka ngritur pika kontrolli në hyrje-daljet e Tiranës në mënyrë që autori të vihet në pranga. Edhe vetë Masha është dërguar në komisariatin numër 1 të Policisë së Tiranës për tu marrë në pyetje në lidhje me ngjarjen.
