Fatos Klosi ka drejtuar Shërbimin Informativ Shtetëror (SHISH) gjatë viteve 1997-2002.
Së fundmi ai është shprehur në një intervistë për gazetën “Sot”, për rolin e Reformës në Drejtësi dhe për ngritjen e SPAK-ut.
Sipas tij, këto të dyja do të sjellin fundin e pushtetarëve të lidhur me krimin. Ish-kryetari i Shërbimit Informativ Shtetëror, ka thënë se struktura e Reformës në Drejtësi do të jetë e mbështetur nga FBI dhe se do të kenë mbështetje dhe mbikëqyrje maksimale nga perëndimorët.
Sipas Klodit, SPAK do të bëjë më së miri punën e vet. Madje, edhe pasuria e “peshqve të mëdhënj” do të zbulohet dhe se askush nuk do të dalë kundër drejtësisë nëse SPAK bashkëpunon me FBI-në.
Ata që kanë vënë dorën në pasurinë e shtetit, e kanë menduar edhe më parë sesi do të mundin të fshehin paratë e tyre. Ndaj edhe ky proces do të jetë shumë i vështirë sipas tij, por jo i pamundur.
Identifikimi i pasurive të të korruptuarve do bëhet më i lehtë me ndihmën nga europianët dhe amerikanët. Kjo sepse sipas Klosit, sistemi bankar ka ndryshuar shumë rregulla dhe shumë ligje përsa i përket pasurive të paprekshme.
Kujtojmë këtu, se dy ditë më parë nga sistemi i lartë i drejtësisë mbetën jashtë dy prokurorët më të rëndësishëm, si Donika Prela dhe Besim Hadermataj. Këta të dy kanë hetuar disa nga dosjet më të nxehta të politikanëve shqiptarë.
