Arben Gjata, rektor i Universitetit të Mjekësisë, ka qenë mbrëmjen e sotme i ftuar në ‘Real Story’ ku ka thënë se vendi ynë ka rreth 190 respiratorë, pajisje jetike për të prekurit nga Coronavirusi që shfaqin përkeqësim të shëndetit.
Po ashtu, sipas Gjatës qeveria ka porositur edhe rreth 100 respiratorë të tjerë.
“Ka të sëmurë që nuk kanë nevojë për oksigjen, kurse ka nga ata që kanë nevojë për oksigjen. Janë rreth 190 respiratorë. Pritet që të vijnë respiratorë të tjerë, e pakta 100. Spitali Infektiv do pajiset me shumë respiratorë. Është vendosur që urgjencat të tranferohen tek Trauma.”, tha Gjata.
Më tej, ai deklaroi se mjekët janë duke u përgatitur edhe për skenarin më të keq të mundshëm, teksa theksoi se janë marrë të gjitha masat për të pasur situatën nën kontroll dhe që gjendja mos të përshkallëzohet.
“Unë di që është një laborator i çeritifikuar pranë ISHP dhe kemi laborator po ashtu edhe në QSUT. Deri tani në Shqipëri është vepruar sipas rekomandimeve të OBSH. Sipas rekomandimeve të OBSH, testimi bëhet vetëm për rastet e dyshuara. Aktualisht janë ngritur dy Task Forca të reja. Deri në këtë fazë janë rreth 460 shtretër. Ne duhet të përgatitemi për më të keqen”.
Deri tani në vendin tonë janë infektuar 51 persona dhe është shënuar një viktimë, teksa mes të prekurve janë edhe 8 mjekë.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
