Deputeti Plarent Ndreca është larguar nga ambientet e SPAK, pasi u mor i pandehur për akuzën e shkeljes së parimeve të barazisë në tendera, lidhur me procedurat e rikonstruksionit të katër komisariateve në vend, në periudhën kur ai mbante postin e sekretarit të Përgjithshëm në Ministrinë e Brendshme.
Ndreca, i cili është deputet i Partisë Socialiste, ka preferuar të mos jepte asnjë koment për mediat dhe ka dalë nga SPAK duke buzëqeshur për kamerat.
Ai u mor në pyetje si i pandehur nga Prokuroria e Posaçme më 25 tetor.
Ndërkohë, deputeti nuk ishte i pranishëm personalisht gjatë seancës, por është përfaqësuar nga avokati i tij, Ermal Yzeiraj.
Akuza është komunikuar gjithashtu edhe për disa zyrtarë të tjerë, si dhe për anëtarë të komisionit të vlerësimit të ofertave.
Kallëzimi në SPAK u bë nga Kontrolli i Lartë i Shtetit, i cili ka ngritur dyshime për shkelje të mundshme të ligjit dhe devijime në procesin e tenderimit për rikonstruksionin e komisariateve të Vlorës, Mirditës, Pogradecit dhe komisariatit nr. 4 në Tiranë.
“Duke iu përgjigjur interesit të gjerë publik, ju komunikojmë se më dt.25.10.2024, të pandehurit, Plarent Ndreca, i është komunikuar, përmes avokatit të tij, përfundimi i hetimeve për procedimin penal nr.240/2021 për veprën penale “Shkelje e barazisë së pjesëmarrësve në tendera apo ankande publike”, parashikuar nga nenet 258 dhe 25 të Kodit Penal. Më shumë detaje do të vijojnë në një moment të dytë”, thuhet në njoftimin zyrtar të SPAK.
