Agjencia Rregullatore për Barnat dhe Produktet Shëndetësore në Mbretërinë e Bashkuar ka paralajmëruar gratë që përdorin injeksione për humbje peshe që të jenë të kujdesshme në rast se planifikojnë shtatzëni.
Sipas autoritetit britanik, gratë duhet të ndalojnë përdorimin e ilaçit të paktën dy muaj përpara se të tentojnë të mbeten shtatzëna dhe të përdorin domosdoshmërisht kontracepsion gjatë kësaj periudhe.
Bëhet fjalë për barnat e njohura si agonistë të receptorëve GLP-1, të përdorura si për menaxhimin e diabetit, ashtu edhe për rënien në peshë. Ilaçe si Ozempic, Wegovy, Mounjaro, Saxenda apo Victoza nuk rekomandohen gjatë shtatzënisë, përpjekjes për të mbetur shtatzënë apo gjidhënies, për shkak të mungesës së të dhënave të mjaftueshme për sigurinë ndaj fetusit.
Sipas MHRA, janë raportuar 40 raste të lidhura me shtatzëni nga gratë që kanë përdorur injeksionet GLP-1. Vetëm për Mounjaro janë identifikuar 26 raste të tilla, ndërsa një grua ka deklaruar se shtatzënia e saj ishte e padëshiruar.
Në tetë raste të tjera për Ozempic dhe Wegovy, si dhe nëntë për Saxenda dhe Victoza, është raportuar e njëjta situatë, duke ngritur shqetësime mbi efektivitetin e kontraceptivëve oralë kur kombinohen me këto barna.
Në fakt, është zbuluar se Mounjaro mund të ulë efektin e pilulave kontraceptive, veçanërisht te gratë me mbipeshë. Për këtë arsye, rekomandohet përdorimi i metodave shtesë si kondomët, sidomos gjatë katër javëve të para të përdorimit dhe pas çdo rritjeje të dozës.
Ministrja britanike për Gratë dhe Barazinë, Bridget Phillipson, theksoi rëndësinë e informimit të plotë përpara përdorimit të këtyre barnave, duke i konsideruar si një fushë ende në zhvillim që kërkon kujdes dhe transparencë.
Ndërkohë, zyrtarja kryesore për sigurinë në MHRA, Dr. Alison Cave, theksoi se këto barna janë medikamente të fuqishme dhe nuk duhet të përdoren për arsye estetike apo thjesht për “dobësim të shpejtë”.
Ajo i bëri thirrje të gjithë përdoruesve që të lexojnë me kujdes udhëzimet dhe të konsultohen me profesionistët e shëndetit para se të fillojnë trajtimin.
Në rrjetet sociale është raportuar një rritje e rasteve të shtatzënive të papritura, me gra që i referohen fëmijëve të tyre si “bebet Ozempic” apo “bebet Mounjaro”, një sinjal që konfirmon nevojën për kujdes të shtuar.
