Plagosja e dyfishtë në Sarandë pasditen e së enjtes dyshohet se ka ndodhur për shkak të një konflikti pronësie.
Dy të rinj nga Kamza, Gëzim Hoxhaj, 32 vjeç, dhe Ernest Lama, 24 vjeç, kishin në përdorim një sipërfaqe toke përgjatë vijës bregdetare në Sarandë, ngjitur me pronën e dy vëllezërve, Ramadan dhe Erjon Canaj, të cilët janë identifikuar si autorët e dyshuar të ngjarjes.
Sipas hetimeve paraprake, konflikti nisi kur Hoxhaj dhe Lama pretenduan se pjesë e tokës së tyre ishte zënë nga familja Canaj.
Pas një takimi për sqarim që përfundoi me përplasje fizike, njëri nga vëllezërit Canaj ka qëlluar me armë në drejtim të dy të rinjve, duke i plagosur.
Të plagosurit u dërguan fillimisht në spitalin e Sarandës dhe më pas në Spitalin e Traumës në Tiranë për trajtim të specializuar.
Pas ngjarjes, autorët u larguan dhe aktualisht janë shpallur në kërkim nga policia. Në vendin e ngjarjes u sekuestrua një çantë me një armë zjarri pistoletë dhe u gjetën katër gëzhoja, ndërsa hetimet po vijojnë për të përcaktuar se kujt i përket arma.
Ndër pistat që po hetohen është edhe një përplasje e mëparshme mes fëmijëve të dy familjeve, e cila dyshohet se ka qenë shkak për agravimin e konfliktit.
Të dy vëllezërit Canaj rezultojnë me precedentë penalë. Ramadan Canaj ka qenë i dënuar më parë në Greqi për vrasje dhe armëmbajtje pa leje, ndërsa aktualisht është nën gjykim për një tjetër çështje penale në Sarandë.
Ndërkohë, Erjon Canaj është arrestuar më herët për dhunë dhe armëmbajtje pa leje.
