Dy personat e shpallur në kërkim lidhur me plagosjen e trefishtë që ndodhi ditën e sotme në Mamurras, janë shoqëruar në polici. Efektivët e forcave Shqiponja kanë bërë të mundur arrestimin e Alfred Prengës dhe Gjon Fufit në ambientët e Spitalit të Traumës, ku kishin shkuar tek vëllai i plagosur i Fufit, Nikollë Vorfi (Fufi).
Ngjarja ndodhi ditën e sotme rreth orës 13:35 në qendër të qytetit të Mamurrasit pas një konflikti për motive banale. Patrulla e policisë ishte vënë në ndjekje të një makine që nuk kishte ndaluar dhe në momentin që makina ka hapur krahun, ka nisur edhe konflikti fizik që degradoi në përplasje me armë zjarri. Të plagosur mbetën dy efektivë policie dhe një person i përfshirë në konflikt, Nikollë Fufi. Policia njoftoi më herët se ishte një prej punonjësve të policisë që ka përdorur armën e shërbimit duke plagosur dy kolegët Ilir Zeka dhe Flamur Lleja dhe personin tjetër. Sipas njoftimit të policisë, personat e plagosur janë jashtë rrezikut për jetën.
Policia njoftoi se një grup i posaçëm hetimor është krijuar për ngjarjen dhe po vijon puna për të sqaruar rrethanat dhe shkaqet që çuan në konflikt. Në Mamurras mbërriti më herët edhe kreu i Policisë së Shtetit, Ardi Veliu e po ashtu edhe Forcat e Ndërhyrjes së Shpejtë.
