Një konflikt për shkak të një qeni ka përfunduar me përdorimin e armës dhe plagosjen e dy fqinjëve në fshatin Gosë të Rrogozhinës.
Ngjarja ndodhi mëngjesin e së premtes, rreth orës 10:15, dhe ka tronditur banorët e zonës.
Autori i dyshuar, Shpëtim Osma, ka qëlluar me armë zjarri ndaj fqinjëve të tij, bashkëshortëve Sami dhe Nadire Disha, pas një përplasjeje që dyshohet të ketë nisur për shkak të lehjeve të vazhdueshme të qenit të çiftit.
Sipas dëshmisë së Osmanit para hetuesve, qeni i tyre i shkaktonte shqetësime të përditshme dhe nuk e linte të flinte. Ai pretendon se kishte kërkuar në mënyrë të përsëritur që qeni të largohej, por pas refuzimit të kësaj kërkese, situata ka degraduar në dhunë.
Osma tha se kishte marrë armën me qëllim që të qëllonte drejt qenit, por plumbat përfunduan te fqinjët.
Si pasojë, Sami Disha mbeti i plagosur në këmbë, ndërsa bashkëshortja e tij në bark. Të dy u dërguan me urgjencë në spital dhe ndodhen jashtë rrezikut për jetën.
Pas ngjarjes, autori u vetëdorëzua në polici dhe ndodhet në ambientet e komisariatit ku po merret në pyetje.
Hetimet vijojnë nën drejtimin e Prokurorisë për të zbardhur plotësisht rrethanat e incidentit.
