Një ngjarje e rëndë ka ndodhur në Bajram Curri, ku një 18-vjeçar ka mbetur i plagosur me thikë pas një konflikti me një 25-vjeçar. Policia ka ndërhyrë menjëherë dhe pas hetimeve ka vënë në pranga autorin e dyshuar të ngjarjes, Sebastjan Dollapaj.
Ngjarja ndodhi një ditë më parë, ndërsa arrestimi i Dollapajt është kryer mëngjesin e sotëm. Ai akuzohet për “Plagosje e rëndë me dashje” dhe “Prodhim, mbajtje, blerje apo shitje pa leje e armëve të ftohta”.
I riu i plagosur ndodhet në spital dhe sipas mjekëve është jashtë rrezikut për jetën. Policia vijon hetimet për të zbardhur plotësisht rrethanat e konfliktit.
Njoftimi i policisë:
Kapet dhe vihet në pranga 25- vjeçari që dyshohet se goditi me thikë 18-vjeçarin, gjatë konfliktit për motive të dobëta, ditën e djeshme në Bajram Curri. Në vijim të veprimeve intensive hetimore të kryera në drejtimin e Prokurorisë së Kukësit, për dokumentimin e plotë të rrethanave të ngjarjes së ndodhur ditën e djeshme, në Bajram Curri, ku u plagos me mjet prerës gjatë një konflikti për motive të dobëta, shtetasi D. H., specialistët për Hetimin e Krimeve në Komisariatin e Policisë Tropojë arrestuan autorin e dyshuar shtetasin Sebastjan Dollapaj, 25 vjeç, banues në fshatin Koçanaj, për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”.
Nga hetimet ka rezultuar se në orët e para të datës 19.07.2025, në qytetin e Bajram Currit, shtetasi Sebastjan Dollapaj, është konfliktuar për motive të dobëta me shtetasin D. H., 18 vjeç, banues në Bajram Curri dhe dyshohet se e ka goditur atë me mjet prerës thikë, e cila u sekuestrua në cilësinë e provës materiale.
18-vjeçari vijon të jetë në kujdesin e mjekëve, jashtë rrezikut për jetën. Materialet procedurale i kaluan Prokurorisë pranë Gjykatës së Shkallës së Parë të Juridiksionit Kukës, për veprime të mëtejshme.
