Sebastian Muçmata, 25 vjeç, i akuzuar për plagosjen e 28-vjeçarit Elvis Halilaj, kushëriri i kryebashkiakut të Kukësit, Albert Halilaj, ka dhënë dëshminë e tij para autoriteteve, duke pohuar se konflikti kishte lidhje me detyrën e vëllait të tij.
I riu u vetëdorëzua në polici mbrëmjen e djeshme dhe përballet me akuzat për “vrasje me dashje në bashkëpunim”, e mbetur në tentativë, si dhe “mbajtje pa leje të armëve dhe municioneve luftarake”.
Në dëshminë e tij, Muçmata deklaroi se nuk kishte ndërmend të vriste askënd, por ngjarja eskaloi pasi vëllai i të plagosurit i kishte drejtuar armën babait të tij.
Ai shtoi se Qerim dhe Elvis Halilaj kishin ushtruar dhunë më herët ndaj vëllait të tij, i cili mban postin e Drejtorit të Drejtorisë së Shërbimeve Publike në Bashkinë e Kukësit.
“Me faktin dhe akuzën u njoha dhe për sa më pyesni dhe më akuzoni kam për të shtuar se nuk kam shkuar për të vrarë njeri, por në momentin që kam shkuar, aty Qerimi (vëllai i të plagosurit) i ka drejtuar armën babait tim Izetit (Muçmata), në këto momente kam shkuar menjëherë te makina dhe kam marrë një armë tip pistoletë që e kisha në bagazh dhe kam qëlluar në drejtim të rrugës ku ishin dy vëllezërit Qerimi dhe Elvisi Halilaj, po të kisha
-
- qëllim për t’i vrarë unë e kisha atë mundësi, por nuk kam pasur qëllim vrasjen e asnjë personi. Unë, kur kam mësuar se pikërisht shtetasit Qerim e Elvis Halilaj kishin rrahur sot te agjencia e Bicajve vëllanë tim Zenelin, i cili ka ngelur pa ndjenja i shtrirë në tokë.
Ky konflikt ka filluar për shkak të detyrës së Zenel Muçmatës, i cili punon në Bashki në funksionin e Drejtorit të Drejtorisë së Shërbimeve Publike dhe Elvis Halilaj pretendon se ka ndikuar ose ka ndërhyrë drejtpërdrejtë për largimin nga puna të Elvis Halilajt”, dëshmoi i Muçmata.
