Policia ka zbardhur detajet e plagosjes me armë të 30-vjeçare J.L., mbrëmjen e djeshme në Shkodër.
Në lidhje me ngjarjen, janë arrestuar A.R., 31 vjeç, E.B., 28 vjeç, R.XH., 22 vjeç.
Të tre këta persona kanë qëlluar me armë zjarri drejt shtetasit M.M., i cili është shpallur në kërkim.
Ky i fundit iu është kundërpërgjigjur të shtënave dhe si pasojë ka mbetur e plagosur kalimtarja J.L.
Kjo e fundit u transportua menjëherë në spitalin e Shkodrës dhe është jashtë rrezikut për jetën.
Në vendin e ngjarjes, policia ka sekuestruar një automjet që i përkiste shtetasit M.M.
Dyshohet se palët kishin konflikte të hershme me njëra-tjetrën.
Materialet iu referuan Prokurorisë së Shkodrës për veprime të mëtejshme.
Njoftimi i policisë
Shkodër
Zbardhet dhe dokumentohet brenda pak orësh ngjarja e ndodhur mbrëmjen e datës 05.02.2020, ku u plagos me armë zjarri shtetasja L. J.
Finalizohet operacioni “Reagimi”.
Operacioni nga DVP Shkodër, në bashkëpunim me DVP Tiranë dhe DVP Durrës.
Kontrolle të shumta, në disa qytete, për kapjen e autorëve.
Arrestohen ne flagrancë 3 shtetas dhe shpallet në kërkim 1 tjetër.
Menjëherë pas ngjarjes së ndodhur në orët e mbrëmjes së datës 5 shkurt, në pedonalen e qytetit, ku si pasojë e shkëmbimit të zjarrit mes dy personave mbeti e plagosur një kalimtare, Drejtoria Vendore e Policisë Shkodër, nën drejtimin e Prokurorisë ngriti një grup të posaçëm hetimi, me qëllim zbardhjen e ngjarjes, identifikimin dhe kapjen e autorëve.
Falë veprimeve të shpejta dhe profesionale të kryera nga grupi hetimor, si dhe në bazë të informacioneve të marra në rrugë operative u bë i mundur identifikimi i autorëve të dyshuar të kësaj ngjarjeje.
Mbi bazën e këtyre informacioneve dhe provave të grumbulluara, nga strukturat e DVP Shkodër, në bashkëpunim DVP Tiranë dhe DVP Durrës, u finalizua operacioni policor “Reagimi, në kuadër të të cilit u bë e mundur kapja dhe arrestimi i në flagrancë i shtetasve:
- R., 31 vjeç, banues në Durrës, E. B., 28 vjeç, banues në Durrës dhe R. Xh., 22 vjeç, banues në Shkup, Maqedoni.
Gjithashtu është shpallur në kërkim M. M., 26 vjeç, banues në fshatin Berdicë, Shkodër.
Nga hetimet e kryera në kohë rekord nga grupi hetimor i DVP Shkodër rezultoi se shtetasit A. R., E. B. dhe R. Xh. kanë qëlluar me armë zjarri mbrëmjen e datës 05.02.2020, rreth orës 22:40, në lagjen “Vasil Shanto”, në drejtim të shtetasit M. M., i cili iu është kundërpërgjigjur me armë zjarri dhe si pasojë ka mbetur e plagosur shtetasja L. J. (kalimtare).
Po nga hetimet dyshohet se këta shtetas kishin konflikte të hershme me njëri -tjetrin.
Në vendngjarje është gjetur dhe sekuestruar një automjet që i përket shtetasit M. M.
Materialet iu referuan Prokurorisë së Rrethit Gjyqësor Shkodër, për veprat penale “Vrasja në rrethana të tjera cilësuese”, “Plagosja e lehtë me dashje” dhe “Armëmbajtja pa leje”.
