Një nga çështjet që ka pushtuar sot sektorin e arsimit padyshim që janë plagjiaturat, duke folur këtu si për diplomat e pedagogëve ashtu edhe për shumë nga librat që tregtohen prej tyre në universitete.
E ftuar në emisionin “Dritare me Rudinën”, Ministrja e Arsimit, Besa Shahini ka thënë se tashmë kjo është duke u marrë në konsideratë seriozisht dhe është duke u punuar.
Gjatë fjalës së saj ka thënë se shitja e librave dhe plagjiaturat në punimet shkencore do të shihen nga një grup i veçantë profesionistësh të fushave të ndryshme, të cilët do jenë të dërguar nga ministria për të bërë një raport të plotë të situatës. Megjithatë Shahini ka thënë se Ministria nuk und të bëjë policin dhe këtu hyn në lojë ndihma e studentëve, të cilët duhet të denoncojnë kur shikojnë raste të tilla abuzimi.
“Më kanë pyetur një grup studentësh nga Shkodra sesi do të goditet fenomeni i plagjiaturave në universitet, e ata thanë se vetë grupet e punës brenda universitetit nuk mund të godasin veten. Iu kam thënë se ne si Ministri e Arsimit nuk mund të ndërhyjmë dot si policë. Ne kërkojmë nga studentët që të jenë të pranishëm në konferencat ku do të shihen plagjiaturat. Duam ndihmën e studentëve edhe në shitjen e librave nga pedagogët. Në rast se ka denoncim nga studentët ne do të veprojmë. Inkurajojmë studentët. Denoncimet ju lutem të bëhen me prova dhe ne do të veprojmë”, tha Shahini.
