Konsiderohej si një nga “pikat e zeza” të qarkullimit rrugor në kryeqytet, ku shpesh ishin bërë aksidente fatale me pasojë humbjen e jetës së njerëzve.
Është fjala për vendin e njohur si “rrethrrotullimi i TEG”, ende pa hyrë në autostradën Tiranë-Elbasan, e cila shumë shpejt do të pësojë një ndryshim rrënjësor.
Edhe pse nuk duhet të ishte sajuar me rrethrrotullim por me një mbikalim që në fillim, kjo pikë duket se tashmë do të nisë nga puna për t’u ndryshuar.
Ndërhyrjet e bëra herë pas here kanë synuar plotësimin me sinjalestikë dhe bërjen më evidente të kujdesit që duhet të tregohet nga shoferët, por Autoriteti Rrugor Shqiptar ka vendosur së fundi që zgjidhja do të ishte një nënkalim.
Ky institucion hapi së fundmi procedurën për ndërtimin dhe për mbikëqyrjen e zbatimit të këtij projekti, duke vënë në dispozicion më shumë se 12 milionë euro.
Projekti
Referuar dokumenteve, detajohet se në aksin Tiranë-Elbasan do të ndërtohet një nënkalim nën “rotondon” me katër korsi (dy për secilin anë të lëvizjes). Koristë e lëvizjes do të jenë me gjerësi 3.75 metra dhe do të jetë për të gjithë llojet e mjeteve.
“Nëpërmjet kësaj rotondoje do të vazhdojë të bëhet hyrja dhe dalja e mjeteve nga rruga Tiranë-Elbasan, për në akset e unazës së madhe. Rruga e vjetër Tiranë-Elbasan, Rruga e Lagjes së sipërme Sauk dhe Rruga e Farkës(TEG)”,- thuhet në detajimin që ARRSH i bën këtij projekti.
Sipas projektit, ngritja e rotondos me 1.7 metra nga niveli aktual ndikon fare pak tek rrugët e tjera dhe rakordohet në gjatësi rreth 50ml. Korsitë e hyrje-daljes nga rotondo në drejtim të Tiranës do të jenë më gjerësi 7.5 metra dhe dy vija kalimi nga 3.25 metra. Koristë nga hyrje-dalje e rotondos në drejtim të Elbasanit do të jenë me gjerësi 5.5 metra dhe me vijë kalimi 4 metra.
“Gjithashtu në rreth rrotullim në anën veriore të kryqëzimit në drejtimin e lëvizjes në unazë e Madhe-Tiranë, është projektuar korsi lëvizjeje e veçantë e cila ruan lëvizjen e vazhduar në krahun e djathtë pa hyrë në rreth rrotullim”,- thuhet në dokument.
Dokumenti vlerëson se rruga Tiranë-Elbasan është projektuar të zgjerohet simetrikisht në të dyja anët. Zgjerimi do të jetë përkatësisht për pjesën rotondo-Tiranë rreth 5 metra, për anë dhe për pjesën Rotondo -Elbasan 3 metra për anë.
/GazetaReforma.com/
